وتاندىق ونەرپاز الەكساندر ليم «نوۆايا ۆولنا – 2025» حالىقارالىق جاس ورىنداۋشىلار بايقاۋىندا جەڭىمپاز اتاندى، دەپ حابارلايدى aqshamnews.kz
ول – وسى فەستيۆالدە جەڭىسكە جەتكەن العاشقى قازاقستاندىق.
ءارتىس الەۋمەتتىك جەلىلەردە كاۆەر-ۆيدەولارىمەن تانىمال بولدى. ءانشى ورىس، اعىلشىن، يتاليان، تۇرىك جانە باسقا تىلدەردە حيت اندەردى ورىنداپ، ۆيدەولارى مىڭداعان قارالىم جيناعان.
2018 جىلى الەكساندر «I’m a singer Kazakhstan» بايقاۋىنا قاتىسىپ، جارتىلاي فينالعا جەتتى. 2021 جىلى ول تانىمال «گولوس ۋكراينى» شوۋىنا قاتىسىپ، نادەجدا دوروفەيەۆانىڭ جەتەكشىلىگىمەن جاسىرىن تىڭدالىمنان ءساتتى ءوتىپ، نوكاۋت كەزەڭىنە دەيىن ونەر كورسەتتى.
سونداي-اق تاعى ءبىر قازاقستاندىق ورىنداۋشى ەرنازار جۇبان دا جۇلدەلى ورىنعا يە بولدى. وتكەن جىلى ول ۆيتەبسك قالاسىندا وتكەن «سلاۆيان بازارى» حالىقارالىق ۆوكال بايقاۋىندا ءبىرىنشى ورىندى جەڭىپ العان ەدى. ءانشى «نوۆايا ۆولنا» دوداسىندا لايىقتى ونەر كورسەتىپ، ءۇشىنشى ورىنعا يە بولدى.
قازاقستان رەسپۋبليكاسىنىڭ مادەنيەت جانە اقپارات مينيسترلىگى ونەرپازداردى جارقىن جەتىستىكتەرىمەن شىن جۇرەكتەن قۇتتىقتايدى جانە جاس انشىلەردىڭ كاسىبي وسۋىنە ۇنەمى قولداۋ كورسەتۋگە دايىن. بۇل جەڭىس ءان ونەرىنىڭ دامۋىنا سەپ بولىپ، ەلىمىزدىڭ الەمدىك دەڭگەيدە ءوز ورنىن نىعايتا تۇسەرى ءسوزسىز.