قاسىم-جومارت توقايەۆ پەن شاۆكات ميرزيويەۆ ءابىلحان قاستەيەۆ اتىنداعى ۇلتتىق ونەر مۋزەيىنە باردى.
مارتەبەلى مەيماندارعا حالىق سۋرەتشىسى ءابىلحان قاستەيەۆتىڭ ءومىرى مەن شىعارماشىلىعى تۋرالى مالىمەت بەرىلدى. مۋزەي كوللەكسياسىندا سۋرەتشىنىڭ شەبەرلىگى شىڭدالعان نەگىزگى كەزەڭدەردى ايشىقتايتىن 450-گە جۋىق تۋىندىسى مەن گرافيكالىق كەسكىندەمەسى ساقتاۋلى تۇر.
سونىمەن قاتار مەملەكەتتەر باسشىلارى وزبەك بەينەلەۋ ونەرىنىڭ نەگىزىن سالۋشىلاردىڭ ءبىرى، ۇلتى قازاق سۋرەتشىسى ورال تاڭسىقبايەۆتىڭ شىعارماشىلىعىنا ارنالعان رەتروسپەكتيۆالىق كورمەنى ارالاپ كوردى.
كورمەگە ي.ۆ. ساۆيسكيي اتىنداعى قاراقالپاقستان مەملەكەتتىك ونەر مۋزەيىنەن، ورال تاڭسىقبايەۆتىڭ مۋزەي-ۇيىنەن، وزبەكستان مەملەكەتتىك ونەر مۋزەيىنەن جانە ءابىلحان قاستەيەۆ اتىنداعى ۇلتتىق ونەر مۋزەيىنەن 76 جۇمىس قويىلعان.
پرەزيدەنتتەر قىلقالام شەبەرىنىڭ ەرەكشە قولتاڭباسى مەن ۇلتتىق بەينەلەۋ ونەرىنە ۇلەس قوسقان شىعارماشىلىق مۇراسىمەن تانىستى. العاش رەت ورال تاڭسىقبايەۆتىڭ ءار كەزەڭدەگى كارتينالارى ءبىر كەڭىستىكتە ورنالاستىرىلدى. بۇل جۇمىستاردىڭ اراسىندا 1920 جىلداردىڭ سوڭى مەن 1930 جىلداردىڭ باسىنداعى العاشقى تۋىندىلاردان باستاپ جىلىمىق ءداۋىرىنىڭ ۇلكەن پولوتنولارىنا دەيىن بار.