جاساندى ينتەللەكتىنىڭ دامۋىنا ارنالعان كورمەدە مەملەكەتتەر باسشىلارى GovTech، Fintech، BigTech، Smart City باعىتتارىنداعى وزىق شەشىمدەرمەن تانىستى. سونىمەن قاتار IT-كومپانيالاردىڭ جەتىستىكتەرى، يننوۆاسيالىق جانە ءبىلىم بەرۋ جوبالارى قويىلعان ارناۋلى ايماقتى ارالاپ كوردى، دەپ حابارلايدى aqshamnews.kz
وزبەكستان پرەزيدەنتىنە اlem.ai حالىقارالىق جاساندى ينتەللەكت ورتالىعىنىڭ تۇجىرىمداماسى تانىستىرىلدى. جوبا قاسىم-جومارت توقايەۆتىڭ باستاماسىمەن جۇزەگە اسىرىلىپ جاتىر.
بۇل ورتالىق مىڭداعان ماماننىڭ جاساندى ينتەللەكت سالاسى بويىنشا ءبىلىم الۋىنا جانە ستارتاپتاردى ىسكە قوسۋعا، عىلىمي-زەرتتەۋ جۇمىستارىن جۇرگىزۋگە مۇمكىندىك بەرەدى.
قاسىم-جومارت توقايەۆ پەن شاۆكات ميرزيويەۆكە ۇلتتىق جاساندى ينتەللەكت پلاتفورماسى تانىستىرىلدى. ونىڭ كومەگىمەن مەملەكەتتىك ورگانداردىڭ جۇمىسىن وڭتايلاندىرۋعا بولادى. سونىمەن قاتار پرەزيدەنتتەرگە ۇلتتىق ەكونوميكاداعى جي الەۋەتىن ارتتىرۋدى جانە تەحنولوگيالىق كاسىپكەرلىكتى قولداۋدى كوزدەيتىن AI-Sana ءبىلىم بەرۋ باعدارلاماسى تۋرالى مالىمەت بەرىلدى.
پرەزيدەنتتەرگە ورتالىق ازياداعى ءىرى تەحنوپاركتەر اليانسى –Central Asian Innovation Hubs قىزمەتى جونىندە باياندالدى.
بىلتىر قازاقستان مەن وزبەكستاننىڭ ءىرى تەحنوپاركتەرىنىڭ ليگاسى ستارتاپتار ەكوجۇيەسىن دامىتۋ جانە الەمدىك نارىقتا يننوۆاسيانى ىلگەرىلەتۋ ماقساتىندا وسى برەند اياسىنا بىرىكتى. ىنتىماقتاستىق شەڭبەرىندە ەكى ەلدىڭ 39 ستارتاپ جوباسى INMerge Innovation Summit، Web Summit 2024 جانە TechCrunch Disrupt 2024 سياقتى اۋقىمدى IT ءىس-شارالارىنا قاتىستى.