ق ر پرەمەر-مينيسترى ءاليحان سمايىلوۆ ماشينا جاساۋ سالاسىن دامىتۋدىڭ 2028 جىلعا دەيىنگى كەشەندى جوسپارىن ازىرلەۋ ماسەلەلەرى جونىندە كەڭەس وتكىزدى، دەپ حابارلايدى Almaty-akshamy.kz primeminister.kz سايتىنا سىلتەمە جاساپ.
مەملەكەت باسشىسىنىڭ تاپسىرماسىنا ساي اتالعان قۇجات بويىنشا جۇرگىزىلىپ جاتقان جۇمىس سالانىڭ ودان ءارى دامۋىنا ۇلكەن سەرپىن بەرۋگە ءتيىس. ونى دايىنداۋ كەزىندە بيزنەستىڭ، اتاپ ايتقاندا، قازاقستان ماشينا جاساۋشىلار وداعىنىڭ ۇسىنىستارى ەسكەرىلدى.
كەشەندى جوسپار وتاندىق وندىرۋشىلەردى قولداۋعا جانە ماشينا جاساۋ سالاسىنىڭ باسەكەگە قابىلەتتىلىگىن ارتتىرۋعا باعىتتالعان 83 ءىس-شارانى قامتيدى. وندا جالپى جۇيەلىك، سونداي-اق سەكتورلار بويىنشا ناقتى شارالار (تاۋ-كەن مەتاللۋرگياسى، تەمىرجول، مۇناي-گاز، ەنەرگەتيكا، ەلەكتر تەحنيكاسى، اۋىل شارۋاشىلىعى ماشيناسىن جاساۋ، اۆتوموبيل جاساۋ، اۋە كەمەلەرىن جاساۋ) ايقىندالعان.
جوسپاردىڭ نەگىزگى ماقساتى – ماشينا جاساۋ سالاسىنداعى جالپى قوسىلعان قۇننىڭ 4،5 ەسە، ءوندىرىس كولەمىنىڭ 2،2 ەسە، ەكسپورتتىڭ 2،9 ەسە، ەڭبەك ونىمدىلىگىنىڭ 1،9 ەسە، ينۆەستيسيالاردىڭ 1،5 ەسەگە ءوسۋىن قامتاماسىز ەتۋ.
قۇجاتتى تالقىلاۋ قورىتىندىسى بويىنشا ءاليحان سمايىلوۆ يندۋستريا جانە ينفراقۇرىلىمدىق دامۋ مينيسترلىگىنە مۇددەلى مەملەكەتتىك ورگاندارمەن جانە ۇيىمدارمەن بىرلەسىپ، كەشەندى جوسپاردى كەلىسۋدى جانە ونى بەكىتۋ تۋرالى ۇكىمەت قاۋلىسىنىڭ جوباسىن ەنگىزۋدى جەدەلدەتۋدى تاپسىردى.