قازاقستان جاۋىنگەرىنىڭ سۇيەگى ەلگە قايتارىلدى

1902 جىلى تۋعان، باتىس قازاقستان وبلىسىنىڭ تۋماسى

ماسكەۋدە قازاقستاننىڭ رەسەيدەگى ەلشىلىگىندە ۇلى وتان سوعىسى كەزىندە قازا تاپقان قازاقستاندىق جاۋىنگەردىڭ سۇيەگىن تاپسىرۋ ءراسىمى ءوتتى، دەپ حابارلايدى Almaty-akshamy.kz.
ەلشىلىكتىڭ رەسمي سايتىنىڭ جازۋىنشا، ءىس-شاراعا ەلشىلىكتىڭ ديپلوماتتارى، «Atamnyn Amanaty» قوعامدىق بىرلەستىگىنىڭ، «رەسەي ىزدەۋ قوزعالىسى» ۇيىمىنىڭ، سونداي-اق قازاق دياسپوراسىنىڭ وكىلدەرى قاتىستى.
جاۋىنگەردىڭ سۇيەگىن 2022 جىلدىڭ 9 شىلدەسىندە لەنينگراد وبلىسىنىڭ توسنەن اۋدانىنداعى «زاسلون» ىزدەۋ توبى تاپتى. جاۋىنگەر مەدالونىندا ساقتالعان بلانكىنىڭ ارقاسىندا جاۋىنگەردىڭ جەكە باسى انىقتالدى - دۋزبايەۆ قالەي، 1902 جىلى تۋعان، باتىس قازاقستان وبلىسىنىڭ تۋماسى.
رەسەيلىك ىزدەۋشىلەر «Atamnyn Amanaty» قوعامدىق بىرلەستىگىنە حابارلاسىپ، ولار ساربازدىڭ تۋىستارىن ىزدەۋگە كىرىسكەن، وكىنىشكە وراي، ولاردى تابا الماعان. جاقىن ارادا جاۋىنگەردى تۋعان جەرىندە تولىق قۇرمەتپەن قايتا جەرلەۋ جوسپارلانۋدا.
«Atamnyn Amanaty» قوعامدىق بىرلەستىگىنىڭ ءتوراعاسى مۇرات مولداعالييەۆ بۇل كۇندەرى كالۋگا وبلىسىندا اسكەري-تاريحي ەكسپەديسياعا قازاقستاندىق «Atamnyn Amanaty» بىرىكتىرىلگەن ىزدەستىرۋ جاساعى العاش رەت قاتىسىپ جاتقانىن ايتتى. ول قازاقستاندىق جانە رەسەيلىك ىزدەستىرۋ جاساقتارىنىڭ بىرلەسكەن جۇمىسى جاقسارىپ، تىڭ سەرپىن الىپ جاتقانىنا ريزا ەكەنىن جەتكىزدى.
ءوز كەزەگىندە «رەسەي ىزدەۋ قوزعالىسى» ۇيىمىنىڭ وكىلى دميتريي فەدوسوۆ قالەي دۇزبايەۆتىڭ تۋىستارى ەرتە مە، كەش پە تابىلىپ، بەيىتىن زيارات ەتە الادى دەگەن ءۇمىتىن جانە جاۋىنگەر تاعدىرىنا اتسالىسقانداردىڭ بارلىعىنا العىسىن ءبىلدىردى.
قازاقستاندىق جانە رەسەيلىك ىزدەۋ جاساقتارىنىڭ بىرلەسكەن جۇمىسى جالعاساتىن بولادى.