الماتىدا قوعامدىق كولىكتەردىڭ باعىتى وزگەردى

جاڭا اۆتوبۋس ىسكە قوسىلدى

الماتىدا قوعامدىق كولىكتىڭ جاڭا باعىتى اشىلىپ، بىرنەشەۋى قوزعالىس سىزباسىن وزگەرتتى، دەپ حابارلايدى Almaty-akshamy.kz.
الماتى كولىك حولدينگىنىڭ مالىمەتىنشە، 15 تامىزدان باستاپ جاڭا №53 اۆتوبۋس ىسكە قوسىلدى. ءجۇرۋ مارشرۋتى: «مامىر-1» ىقشاماۋدانىنان باستاپ، مومىش ۇلى كوشەسى بويىمەن رايىمبەك داڭعىلىنا بارادى. جول بويىندا №7 قالالىق اۋرۋحانادان وتكەن سوڭ، «تەرەكتى» ىقشاماۋدانىنا قاراي وڭعا بۇرىلادى. ارى قاراي №184 مەكتەپتەن وتكەن سوڭ بۇرىلىپ، كەرى باعىتتا جۇرەدى. رايىمبەك داڭعىلىنان سوڭ، مومىش ۇلى كوشەسىمەن كوتەرىلىپ، اباي داڭعىلىنا بۇرىلادى، كەيىن ساين - شالياپين كوشەلەرىنىڭ قيىلىسىنا بارادى.
سونىمەن قاتار 15 تامىزدان باستاپ № 110، 116، 137، 138، 212ء-شى مارشرۋتتاردىڭ باعىتتارى وزگەردى.
№ 110 اۆتوبۋس ەندى اباي داڭعىلىمەن ءجۇرىپ، مومىش ۇلى مەتروسىنا جەتەدى، ءارى قاراي سىزبا بويىنشا قوزعالادى.
№ 116 اۆتوبۋس ەندى «نۇرلى تاۋ» ىقشاماۋدانىنان شىققاندا، ءال-فارابي داڭعىلىنان گاگارين داڭعىلىنا بۇرىلىپ، تيميريازيەۆ كوشەسى - رادوستوۆەس كوشەسى - جاندوسوۆ كوشەسى - گاگارين داڭعىلى - تولە بي كوشەسى - روزىباكييەۆ كوشەلەرىن باسىپ ءوتىپ، ارى قاراي سىزبا بويىنشا جۇرەدى. كەرى باعىتى: روزىباكييەۆ - تولە بي - گاگارين - جاندوسوۆ – ايمانوۆ تيميريازيەۆ - گاگارين - قوجابەكوۆ - روزىباكييەۆ كوشەلەرى، ارى قاراي قالىپتى سىزبامەن جۇرەدى.
№137 مارشرۋت ەكى باعىتقا ( №137 جانە №138) ءبولىندى. №137 مارشرۋت قوزعالىسى «ادەم - 1» ساۋدا ورتالىعىنان باستالىپ، ودان ارى بۇرىنعى سىزبامەن جالعاسادى. كەرى باعىتتا سولتۇستىك اينالىمنىڭ جول ايىرىعىنا جەتكەن سوڭ، بۇرىلىپ، ارى قاراي «ادەم -1» ساۋدا ورتالىعىنىڭ ايالداماسىنا قاراي جۇرەدى.
№138 مارشرۋت «جەتىسۋ» بازارىنان رىسقۇلوۆ داڭعىلى - سەيفۋللين داڭعىلى - اقان سەرى كوشەسى - جۇمابايەۆ كوشەسى - سولتۇستىك اينالما جولى، «ادەم-1» ساۋدا ورتالىعىنا دەيىن قاتىنايدى. كەرى باعىتتا سولتۇستىك اينالما جولى - جۇمابايەۆ كوشەسى - سەيفۋللين داڭعىلى - رىسقۇلوۆ داڭعىلى - جاياۋ مۇسا كوشەسىمەن ءجۇرىپ، «جەتىسۋ» بازارىنا كەلەدى.
№212 اۆتوبۋسى ەندى جاندوسوۆ كوشەسىمەن كەلە جاتىپ، ساين كوشەسىنە بۇرىلادى، رىسقۇلبەكوۆ كوشەسىنەن وتكەن سوڭ بۇرىلىپ، جاندوسوۆ كوشەسىنە دەيىن كەرى باعىتتا جۇرەدى، ءارى قاراي – سىزبا بويىنشا.