ءۇش جىلدان سوڭ سەكتور شامامەن 200 مىڭعا دەيىن ماماننىڭ جەتىسپەۋىن سەزىنۋى ىقتيمال.
ساراپشىلاردىڭ ايتۋىنشا، كاسىپورىندار بۇگىننىڭ وزىندە كەم دەگەندە 18 مىڭ بوس ورىندى جابۋى كەرەك. ال، بۇل ءبىر جىل بۇرىنعى كورسەتكىشتەن 60%-عا كوپ، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ەڭبەك رەسۋرستارىن دامىتۋ ورتالىعىنىڭ ساراپشىلارى بار گاپ باسەكەگە قابىلەتسىز جالاقى، «قىزمەتكەرلەردىڭ قارتايۋى» جانە جاستار ءۇشىن جۇمىسشى كاسىپتەرىنىڭ تارتىمسىز بولۋىندا دەپ سانايدى. ماسەلەن، وڭدەۋ ونەركاسىبىندە ءقازىر جۇمىسپەن قامتىلعان جاستاردىڭ ۇلەسى بار بولعانى 20% قۇرايدى.
"نەلىكتەن تاپشىلىق بار؟ ارينە، بۇل ەڭ الدىمەن جالاقىنىڭ تومەندىگىمەن بايلانىستى. ماسەلەن، بۇگىندە ەلەكتروندىق ەڭبەك بيرجاسىندا ونەركاسىپ سالاسىندا 6 مىڭعا جۋىق بوس جۇمىس ورنى بار. ونداعى ورتاشا جالاقى 130 مىڭ تەڭگەگە جۋىقتايدى. ارينە، ەڭبەك اقىسى ميلليون تەڭگەگە دەيىن جەتەتىن ينجەنەرلەر بار، ءبىراق مەحانيك، تەحنيك سىندى سۇرانىسقا يە، ياعني 2-3 جىل وقىعان مامانداردىڭ ەڭ تومەنگى ايلىعى شامامەن 60 مىڭ تەڭگە باعالانادى. سوندىقتان بۇگىنگى جالاقى كوتەرىلمەي كاسىپورىندار كوپ ۇزاماي كادرلىق تاپشىلىقتى باستان كەشىرەتىنى ءسوزسىز"، - دەيدى ق ر ەحاقم ەڭبەك رەسۋرستارىن دامىتۋ ورتالىعىنىڭ باسقارۋشى ديرەكتورى الەكساندرا مولچانوۆسكايا.
جۇمىس جوق ەمەس، بار. ماماندار دا جەتكىلىكتى. الايدا، سۇرانىس جۇمىس بەرۋشىنىڭ ۇسىنىسىنا سايكەس كەلمەي، تەحنيكالىق ماماندار وزگە كاسىپتى مەڭگەرۋگە ءماجبۇر.
"جاستاردىڭ 40% جۋىعى ءوز ماماندىعى بويىنشا جۇمىس ىستەمەيدى. يا، ولار 2-3 جىل وقىدى، ارالارىندا تەحنيكالىق گرانت العاندارى بار. تەك كەيىن بۇل كاسىپتىڭ وتە تومەن باعالاناتىنىن كورەدى. سوندىقتان، جۇمىس كەستەسى وزىنە قولايلى، ايلىعى بىرنەشە ەسە جوعارى قىزمەت كورسەتۋ سالاسىنا كەتۋگە ءماجبۇر بولادى. ارينە، اركىم وزىنە ءتيىمدىسىن تاڭدايدى عوي"، - دەيدى ق ر ەڭبەك رەسۋرستارىن دامىتۋ ورتالىعىنىڭ باسقارۋشى ديرەكتورى الەكساندرا مولچانوۆسكايا.
بۇل ورايدا ايتا كەتەرلىك جايت، ونەركاسىپ سالاسىنداعى بوس جۇمىس ورىندارىنىڭ ۇشتەن بىرىنەن استامى ەلىمىزدىڭ ءۇش وڭىرىنە تيەسىلى. كادرلارعا دەگەن ەڭ جوعارى قاجەتتىلىك قوستاناي، قاراعاندى، جانە الماتى وبلىستارىندا تىركەلگەن. سونىمەن قاتار، سوڭعى ۋاقىتتا قارجى جانە ساقتاندىرۋ قىزمەتى، مەملەكەتتىك باسقارۋ، دەنساۋلىق ساقتاۋ، كولىك جانە قويمالاۋ سالاسىندا مامان تاپشىلىعى بايقالادى.