الماتى قالالىق ونكولوگيالىق ورتالىعى جانە ورتالىق قالالىق كلينيكالىق اۋرۋحانا بازاسىندا امەريكاندىق دارىگەرلەردىڭ قاتىسۋىمەن «ونكوۋرولوگيا جانە ۋرولوگياداعى زاماناۋي تاسىلدەمەسى» اتتى بەس كۇندىك شەبەرلىك ساعاتى وتكىزىلدى.
اتالمىش ماستەر-كلاسس قوعامدىق دەنساۋلىق باسقارماسىنىڭ شەشىمى بويىنشا جەرگىلىكتى بيۋدجەت ەسەبىنەن جۇرگىزىلۋدە، دەپ حابارلايدى Almaty-akshamy.kz
ءىس-شاراعا ەمحانا جانە ستاسيوناردىڭ ۋرولوگ-دارىگەر جانە ونكوۋرولوگ-دارىگەرلەرى، قالانىڭ مەديسينالىق ۋنيۆەرسيتەتى كافەدراسىنىڭ قىزمەتكەرلەرى، رەزيدەنتتەر، ينتەرندەر، سونداي-اق، نۇر-سۇلتان قالاسىنان، سەمەي جانە ت.ب. ايماقتاردان كەلگەن دارىگەرلەر قاتىستى. ورتالىق قالالىق كلينيكالىق اۋرۋحانانىڭ كونفەرەنس-زالىندا ونلاين تۇردە وپەراسيا كورسەتىلدى.
ونكوحيرۋرگيا بولىمشەسىنىڭ مەڭگەرۋشىسى نۇرلان بالتايەۆتىڭ ايتۋىنشا، بۇل ماستەر-كلاسس امەريكاندىق ارىپتەستەردىڭ ءوزىنىڭ ىس-تاجىريبەسىمەن بولىسۋگە جانە الماتىلىق دارىگەرلەردىڭ تاجىريبەسىنە ەڭ مىقتى تەحنولوگيالاردى ەنگىزۋ ءۇشىن كوزدەلگەن. العاشقى كۇنى ءۇش وپەراسيا جۇرگىزىلدى.
«ءبىرىنشى وپەراسيا قۋىقتىڭ قاتەرلى ىسىگىمەن اۋراتىن ناۋقاسقا جاسالدى، ناۋقاستا جايىلعان ۇدەرىس - وڭ جاق نەسەپ جولىنىڭ وسكىندەرى بەلگىلەنگەن قاتەرلى ىسىكتىڭ ينۆازيۆتىك ءتۇرى، ياعني، نەسەپاعار جولى وڭ جاق بۇيرەك جاعىنان بۇزىلعان. سوندىقتان دا «اشىق» (لاپاروسكوپيا جولىمەن ەمەس) وپەراسيا ءتۇرىن جاساۋعا شەشىم قابىلداندى. وپەراسيا كەزىندە ناۋقاسقا قۋىعىن جانە قۋىق استى بەزىن الىپ تاستاپ، ىشەكتەن جاڭا نەسەپ جولىن قالىپتاستىردى. كەيىننەن، الىنعان تىندەردىڭ تالداماسىنان سوڭ قاجەتتى بولعاندا، ەمدەۋ ۇدەرىسىنىڭ كەلەسى ساتىسى بەلگىلەنەدى»- دەيدى مامان.
ەكىنشى وپەراسيا «سول جاق بۇيرەگىنىڭ قاتەرلى ىسىگى» دياگنوزىمەن وپەراسيا جۇرگىزىلدى، وندا دا ىسىك ۇلكەن بولىپ ۇلعايىپ كتەكەن. بۇل جاعدايدا ونكوۋرولوگتار لاپاروسكوپيا جولىمەن ناۋقاسقا سول بۇيرەگىن الىپ تاستادى. بۇگىنگى كۇنى ىسىك اۋرۋلارى كەزىندە قۋىق استى بەزى مەن قۋىقتى الىپ تاستاۋ بويىنشا راديكالدى وپەراسيالار قالامىزدا دارا تۇردە جۇرگىزىلەدى. سول سەبەپتى اتالمىش ماستەر-كلاسس وزەكتى جانە ۋرولوگتاردىڭ ەرتەدەن انىقتاپ دياگنوستيكالاۋ جانە ەمدەۋ ءبىلىمى مەن داعدىلارىن ارتتىرۋعا، قۋىق جانە قۋىق استى بەزىنىڭ قاتەرلى ىسىگى كەزىندەگى ءشاعىنينۆازيۆتى جانە جوعارى تەحنولوگيالىق وپەراسيالاردى جۇرگىزۋ تاجىريبەسىن مەڭگەرۋگە باعىتتالعان.
«ماستەر-كلاسس تاراپىندا ءبىزدىڭ ماماندار ونكوۋرولوگيالىق وپەراسيا جۇرگىزۋدەگى تاجىريبەلەرىمەن ءبولىستى، ءبىز امەريكاندىق ارىپتەستەرىمىزدىڭ قانداي ادىستەردى قولداناتىنىن ايقىن كورىپ، ولاردىڭ تاجىريبەسىن وزىمىزدىكىمەن سالىستىردىق»، - دەپ تۇيىندەدى نۇرلان بالتايەۆ.
بۇدان ءارى، جۇرگىزىلگەن وپەراسيادان سوڭ، امەريكاندىق ارىپتەستەر وقكا بازاسىندا ونكوۋرولوگيالىق اۋرۋشاڭدىق تاقىرىبى بويىنشا، ماسەلەن، قۋىق استى بەزىنىڭ قاتەرلى ىسىگىن ەمدەۋدەگى زاماناۋي ادىستەر، راديكالدى سيستپروستاتەكتوميا كەزىندەگى نەسەپ جولىن دەريۆاسيالاۋ ادىستەرى جانە راديكالدى وپەراسيا كورسەتكىشتەرى تۋرالى جانە ت.ب. دارىستەر جۇرگىزەدى.
