بۇرىنعى ۇلتتىق قۇرامانىڭ باس باپكەرى سەرىك سارسەمباي ۇلى بەردالين 79 جاسىندا دۇنيەدەن ءوتتى، دەپ حابارلايدى اqshamnews.kz ءتىلشىسى.
بەلگىلى مامان ۇزاققا سوزىلعان سىرقاتىنان كەيىن ومىردەن وزعان. قاراعاندىنىڭ «ءشاحتور» كلۋبى قارالى حاباردى رەسمي تۇردە راستادى.
كلۋب مالىمدەمەسىندە سەرىك بەرداليننىڭ تاعدىرى قازاق فۋتبولىمەن تىعىز بايلانىستى بولعانى اتاپ ءوتىلدى. ول باپكەرلىككە «ءشاحتور» كلۋبىندا العاشقى قادامدارىن جاساپ، 1965 جىلى كوماندا دۋبلىندە ويناي باستادى. 1966 جىلعى ماۋسىمدا «ا» كلاسى ساناتىندا ءۇش ماچ وتكىزىپ، ءبىر گول سوققان. كەيىن «مەتاللۋرگ»/«سترويتەل» (تەمىرتاۋ) كوماندالارىندا ونەر كورسەتىپ، 1973–1975 جىلدارى «ءشاحتور» ساپىندا قورعاۋشى رەتىندە مانسابىن اياقتاعان.
باپكەر رەتىندە دە بەردالين ەلەۋلى جەتىستىكتەرگە جەتتى: 1995 جىلى «شاحتورمەن»، ال 1998 جىلى «ەرتىسپەن» قازاقستان چەمپيوناتىنىڭ قولا جۇلدەگەرى اتاندى. ول جاس ويىنشىلاردىڭ دامۋىنا، قاراعاندىلىق كلۋبتىڭ قالىپتاسۋىنا جانە جالپى وتاندىق فۋتبولعا ۇلكەن ۇلەس قوستى.
«سەرىك سارسەمباي ۇلى – ءوز ءىسىنىڭ حاس شەبەرى عانا ەمەس، ءاردايىم شابىت بەرىپ، قولداۋ كورسەتىپ، شاكىرتتەرىنە سەنىم ۇيالاتا بىلگەن جان ەدى. ونىڭ جارقىن بەينەسى ارىپتەستەرىنىڭ، جاقىندارىنىڭ، شاكىرتتەرىنىڭ جانە فۋتبولدى سۇيەتىن بارلىق جاننىڭ جۇرەگىندە ساقتالادى»، – دەلىنگەن «ءشاحتور» حابارلاماسىندا.
سەرىك بەردالين «جەتىسۋ»، «ەسىل» كوماندالارىن جانە 1995–1997 جىلدارى قازاقستان ۇلتتىق قۇراماسىن باسقاردى. كەيىن قازاقستان رەسپۋبليكاسىنىڭ فۋتبول جونىندەگى مەملەكەتتىك ترەنەرى قىزمەتىن اتقاردى.
ول – قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى، ق ر ەڭبەگى سىڭگەن سپورت قايراتكەرى، سونداي-اق 1995 جىلعى «جىلدىڭ ۇزدىك باپكەرى» اتاعىنىڭ يەگەرى.
مارقۇمنىڭ وتباسىنا، تۋعان-تۋىستارى مەن قازاق فۋتبول قاۋىمداستىعىنا قايعىرا كوڭىل ايتامىز.