وسكەمەن قالاسىندا 1-5 قازان كۇندەرى ق ر مادەنيەت جانە اقپارات مينيسترلىگى مەن شىعىس قازاقستان وبلىسى اكىمدىگىنىڭ قولداۋىمەن قازاقستان دراما تەاترلارىنىڭ XXX رەسپۋبليكالىق فەستيۆالى ءوتىپ جاتىر.
كورنەكتى جازۋشى، بالالار ادەبيەتىنىڭ كلاسسيگى بەردىبەك سوقپاقبايەۆتىڭ 100 جىلدىعىنا ارنالعان فەستيۆالدىڭ ۇيىمداستىرۋشىسى — قاليبەك قۋانىشبايەۆ اتىنداعى قازاق ۇلتتىق مۋزىكالىق دراما تەاترى، دەپ حابارلايدى aqshamnews.kz.
فەستيۆالدىڭ نەگىزگى ماقساتى – قازاقستان تەاتر ونەرىن دامىتۋ، دارىندى ارتىستەر مەن رەجيسسەرلەردى انىقتاۋ جانە قولداۋ. سونىمەن قاتار، فەستيۆال قازاقستاندا ءداستۇرلى تەاتر ونەرىن ساقتاۋ، قازاق بالالار ادەبيەتىن دارىپتەۋ، جانە بەردىبەك سوقپاقبايەۆتىڭ شىعارماشىلىق مۇراسىن ماڭگى ەستە ساقتاۋ سىندى ماقساتتاردى كوزدەيدى.
1992 جىلدان بەرى ۇيىمداستىرىلىپ كەلە جاتقان فەستيۆالدە ءار جىلدارى ءتۇرلى وڭىرلەردەن تەاتر ۇجىمدارى بالالار مەن جاسوسپىرىمدەرگە ارنالعان قويىلىمدارىن ۇسىنادى. بيىل فەستيۆالگە 10 تەاتر ۇجىمى قاتىسۋدا. ولاردىڭ قويىلىمدارى شىعىس قازاقستان وبلىستىق دراما جانە وپەرەتتا تەاترىنىڭ ساحناسىندا كورسەتىلەدى.
فەستيۆال جەڭىمپازدارى «ۇزدىك سپەكتاكل»، «ۇزدىك رەجيسسەرلىك شەشىم»، «ۇزدىك سەنوگرافيالىق شەشىم»، «ۇزدىك ەر ادام ءرولى»، «ۇزدىك ايەل ءرولى» جانە باسقا دا نوميناسيالار بويىنشا انىقتالادى.
فەستيۆال اياسىندا بەرىلەتىن باستى ماراپاتتاردىڭ ءبىرى — «بەردىبەك سوقپاقبايەۆ اتىنداعى ارنايى سىيلىق».
جەڭىمپازداردى ماراپاتتاۋ ءراسىمى 5 قازان كۇنى وتەدى.