الماتىدا قارت ادامدارعا قاتىستى الاياقتىق جيىلەپ كەتتى.
كوبىنەسە بۇل الاياقتىق قۇربانداردىڭ ۇيىنە نەمەسە تەلەفوندارىنا قوڭىراۋ سوعۋ ارقىلى بولادى، دەپ حابارلايدى aqshamnews.kz Polisia.kz-كە سىلتەمە جاساپ.
– كوبىنە الاياقتاردىڭ ايلاسىنا ەگدە جاستاعى ازاماتتار ءتۇسىپ قالادى. قاسكويلەر ولاردى تەز الداۋعا بولاتىنىن بىلەدى. الداۋدىڭ بىرنەشە تانىمال تىزبەكتەرى بار. ءبىز ولاردى ارنايى بروشيۋرالار مەن جادىنامالاردا كورسەتتىك. ساياباقتاردا، الاڭدار مەن زەينەتكەرلەر ءجيى باراتىن ورىنداردا اقپاراتتىق پاراقشالاردى تاراتۋ ارقىلى پروفيلاكتيكالىق ناۋقان جۇرگىزىپ جاتىرمىز، – دەدى الماتى قالالىق پد جەرگىلىكتى پوليسيا قىزمەتى باسقارماسى باستىعىنىڭ ورىنباسارى تيمۋر نوعايبايەۆ.
الماتى پوليسياسى ازاماتتاردى اباي بولۋعا، كۇماندى قوڭىراۋلارعا سەنبەۋگە، ەموسياعا بەرىلمەۋگە، جاقىن تۋىستارى تۋرالى اقپارات بەرمەۋگە جانە ەگدە جاستاعى ازاماتتاردى الاياقتىقتىڭ تۇرلەرى تۋرالى ەسكەرتۋگە شاقىرادى.
– مۇنداي الاياقتىق تۋرالى جاقىن تۋىستارىڭىز بەن دوستارىڭىزعا، اسىرەسە قارتتارعا ەسكەرتىڭىز. بەيتانىس ادامنان تەلەفون قوڭىراۋىن العاندا، ونىڭ سىزگە نە جانە قالاي ايتقىسى كەلەتىنىنە نازار اۋدارىڭىز. الاياقتار، ادەتتە، اسىقتىرۋعا، شاتاستىرۋعا جانە ىقتيمال سالدارىن ايتىپ قورقىتۋعا تىرىسادى. كەز كەلگەن الىنعان اقپارات تەكسەرىلۋى كەرەك. وسىنداي جاعدايعا تاپ بولساڭىز، “102” پۋلتىنە نەمەسە جاقىن جەردەگى پوليسيا بولىمشەسىنە حابارلاسىڭىز، – دەدى تيمۋر نوعايبايەۆ.