بۇگىن ەۋروپا وداعى رەسەيگە باعىتتاعان 11ء-شى سانكسيا پاكەتىن جاريالادى. الدىنعىلارىنان ايىرماشىلىعى – سانكسيالاردى ءۇشىنشى ءبىر مەملەكەت ارقىلى اينالىپ ءوتۋدىڭ الدىن الۋعا باعىتتاعان. بىلايشا بۇل سانكسيا سەرياسى رەسەيگە استىرتىن كومەكتەسىپ جاتقان مەملەكەتتەردى نىساناسىنا الىپ وتىر.
دەمەك، بۇل ورتا ازيا ەلدەرىنە، سونىڭ ىشىندە رەسەيمەن تىعىز ساۋدا-ەكونوميكالىق بايلانىسقا يە قازاقستانعا دا قاتىستى.
سانكسيا تالاپتارىنا سايكەس، ەندىگى جەردە ەو رەسەيدىڭ اسكەري ارەكەتتەرىنە جاردەم بەرە الاتىن تاۋارلاردى ەكسپورتتاۋعا شەكتەۋ قويادى. تىكەلەي رەسەيگە ەكسپورت ەرتەدەن شەكتەلگەن. الداعى ۋاقىتتا استىرتىن كومەك كورسەتىپ وتىر دەپ تانىلعان ەلدەرگە دە ەكسپورتتاۋعا تىيىم سالماق.
رەسەيدىڭ مۇناي ونىمدەرىنە قاتىستى شەكتەۋدە كۇشەيە تۇسكەن. وداق مۇشەلەرىنىڭ پورتتارىنا رەسەيلىك مۇناي ونىمدەرىن تاسىمالداعان كەمەلەر كىرە الماي قالۋى مۇمكىن.
ۋكراينا داعدارىسىنا بايلانىستى رەسەي مەن ەۋروپا ەلدەرىنىڭ اراسىنداعى تەكە-تىرەس ابدەن قاتال بولا تۇسكەن. ەندى مىنە رەسەيگە سانكسيادان جالتارۋعا كومەكتەستى دەلىنگەن ءۇشىنشى ءبىر ەلدەر دە سانكسياعا ىلىنگەلى وتىر.
ماسەلە بىزگە دە قاتىستى
ۋكراينادا سوعىس باستالىپ، باتىس سانكسياسى كۇشەيۋىمەن قاتار ورتا ازيا ەلدەرىنە تاۋار تاسىمالداۋ كولەمى ىلەسە كوبەيدى. ەو ايماق ەلدەرى ارقىلى رەسەيگە ەكسپورتتاۋعا شەكتەۋ قويىلعان تاۋارلار ءوتىپ كەتىپ جاتقانىنا رەنىش ءبىلدىرىپ كەلگەن.
بۇل ماسەلەنى ايماق ەلدەرىنىڭ باسشىلارىمەن تالقىلاۋعا بىرەر مارتە ەۋروپالىق لاۋازىمدىلار دا كەلىپ قايتقان. ءتىپتى ەۋروپالىق كوميسسيانىڭ ءتوراعاسى شارل ميشەل دە «ورتا ازيا – ەو» سامميتىندە ماسەلەگە سالماق بەرىپ كەتىپ ەدى.
ارينە، وا ەلدەرى ءۇشىن بۇل مۇلدە ىڭعايسىز جاعداي. ءبىر جاعىندا قۋاتتى ەو، ەندى ءبىر جاعىندا وزىنە ەكونوميكالىق ءام ساياسي ىقپالى باسىم ماسكەۋ. ونىڭ ۇستىنە تەڭىز جولدارى ءتۇرلى سەبەپتەرمەن قىسىلا باستاعان قازىرگى كەزدى ايماق ەلدەرى ماڭىزدى ترانزيتتىك ەلدەرگە اينالىپ قالدى.
قوس تاراپتىڭ مۇددە قايشىلىعىنا بارىپ تىرەلەتىن بۇل ىستە قازاقستان، قىرعىزستان سەكىلدى ەاەو-عا مۇشە ەلدەرى ءۇشىن ءتىپتى سىن كۇشتى. سوندىقتان ەكى ەلدىڭ ۇكىمەتتەرى وسىعان دەيىندە وزىندىك جاۋاپ ارەكەتتەرىن جاساپ جاتىر.