2024 جىلعى 12 ناۋرىزدا پرەمەر-مينيستردىڭ ورىنباسارى سەرىك ءجۇمانعاريننىڭ توراعالىعىمەن وتكەن سىرتقى ساۋدا ساياساتى جانە حالىقارالىق ەكونوميكالىق ۇيىمدارعا مۇشەلىك ەتۋ ماسەلەلەرى جونىندەگى ۆەدومستۆوارالىق كوميسسيا سىرتقى ساۋدانى رەتتەۋ ماسەلەلەرى بويىنشا ءبىرقاتار شەشىم قابىلدادى.
قازاقستان اۋماعىنان سۇيىتىلعان مۇناي گازىن شىعارۋعا تىيىم سالۋ 6 اي مەرزىمگە ۇزارتىلدى. بۇعان دەيىن تىيىم شەكارا ماڭىنداعى ەلدەرگە سۇيىتىلعان مۇناي گازىن شىعارۋ جانە ىشكى نارىقتا تاپشىلىقتىڭ تۋىنداۋىن بولدىرماۋ ماقساتىندا سالىنعان بولاتىن، دەپ حابارلايدى Almaty-akshamy.kz.
بيدايدى اۆتوموبيل، تەمىرجول، سونداي-اق سۋ كولىگىمەن اكەلۋگە تىيىم سالۋ تاعى جارتى جىلعا ۇزارتىلدى. قر-عا بيدايدى رەسەي فەدەراسياسىنىڭ شەكارالاس ايماقتارىنان اكەلۋدىڭ جانە ونى اۆتوموبيل كولىگىمەن كەرى ەكسپورتتاۋدىڭ «سحەمالارىن» ىسكە اسىرۋ ءقاۋپى ءالى دە ساقتالۋدا. ءوز ونىمدەرىن ءوندىرۋ جانە تۇتىنۋ ءۇشىن ۇن تارتاتىن جانە قۇس وسىرەتىن كاسىپورىندارعا تەمىرجول ارقىلى تاسىمالداۋعا ەرەكشە جاعدايلار جاسالدى. اكەلىنەتىن بيدايدى ىشكى جانە سىرتقى نارىقتاردا ساتۋعا بولمايدى.
سونداي-اق قىتايلىق مويىنتىرەكتەر وندىرۋشىلەرى مەن ءۇندىستاندىق ەلەكترودتار وندىرۋشىلەرىنە قاتىستى دەمپينگكە قارسى شارالاردى 5 جىلعا ۇزارتۋ ماقۇلداندى. بۇل شارالار ۇقساس تاۋارلاردىڭ وتاندىق وندىرۋشىلەرىن قورعاۋ ءۇشىن قابىلداندى. مويىنتىرەكتەر ءۇشىن دەمپينگكە قارسى باج سالىعى تاۋار قۇنىنىڭ 31،3-41،5%-ىن، گرافيتتەلگەن ەلەكترودتار ءۇشىن 16،04-32،83%-ىن قۇرايدى.