قازاقستان رەسپۋبليكاسى سىرتقى ىستەر مينيسترلىگىنىڭ ينۆەستيسيالار كوميتەتىنىڭ ءتوراعاسى عابيدوللا وسپانقۇلوۆ پەن «Kazakh Invest» ۇلتتىق كومپانياسىنىڭ اقش-تاعى شەتەلدىك وكىلى مارات ءبىرىمجاننىڭ قاتىسۋىمەن تەحنولوگيالىق شەشىمدەر، ونەركاسىپ، دەنساۋلىق ساقتاۋ جانە ەنەرگەتيكا سالالارىنداعى ءىرى امەريكالىق كومپانيالاردىڭ باسشىلىعىمەن ءبىرقاتار كەزدەسۋلەر وتكىزىلدى.
اتالعان كەزدەسۋلەردە قازاقستاننىڭ ينۆەستيسيالىق الەۋەتى، تەحنولوگيالىق الماسۋ جانە ءوندىرىستى جەرگىلىكتەندىرۋ ماسەلەلەرى تالقىلاندى، دەپ حابارلايدى aqshamnews.kz ءسىم سايتىنا سىلتەمە جاساپ.
ماڭىزدى كەزدەسۋلەردىڭ العاشقىسى «Honeywell Technology Experience Center» ورتالىعىنىڭ وكىلدەرىمەن وتكىزىلدى. كەزدەسۋ بارىسىندا ونەركاسىپتىك اۆتوماتتاندىرۋداعى يننوۆاسيالىق شەشىمدەر، بالامالى اۆياوتىن ءوندىرۋ، ءوندىرىستى سيفرلاندىرۋ جانە قازاقستاندا وزىق تەحنولوگيالاردى ەنگىزۋ ماسەلەلەرى تالقىعا سالىندى.
الەمدەگى جەتەكشى اگروونەركاسىپتىك «Archer Daniels Midland» كورپوراسياسىمەن وتكەن كەلىسسوزدەر بارىسىندا اۋىل شارۋاشىلىعى ونىمدەرىن قايتا وڭدەۋ، اگروسەكتورعا وزىق تەحنولوگيالاردى ەنگىزۋ جانە ەكسپورتتىق جەتكىزىلىمدەردى كەڭەيتۋ مۇمكىندىكتەرى تالقىلاندى. بۇل كەزدەسۋدە قازاقستاندىق تاراپ استىقتى قايتا وڭدەۋ جانە وسىمدىك مايىن ءوندىرۋ بويىنشا الەۋەتتى جوبالاردى تانىستىرىپ، وسى سالالارداعى ءوندىرىستى قازاقستاندا جەرگىلىكتەندىرۋگە قولايلىعى تۋرالى اتاپ ءوتتى.
وعان قوسا «Pfizer» كومپانياسىمەن وتكەن كەزدەسۋدىڭ باستى تاقىرىبى قازاقستانداعى فارماسيەۆتيكا سالاسىن دامىتۋ، زاماناۋي بيوتەحنولوگيالاردى ەنگىزۋ جانە دارىلىك زاتتار ءوندىرىسىن جەرگىلىكتەندىرۋ ماسەلەلەرى جايلى بولدى.
سونداي-اق تەحنولوگيالار، قاۋىپسىزدىك جانە سيفرلىق شەشىمدەر سالاسىنداعى ءىرى امەريكالىق كومپانيا «Leidos»-پەن كەلىسسوزدەر ءوتتى. بۇل كەزدەسۋدە ينتەللەكتۋالدى كولىك جۇيەلەرى ءۇشىن تەحنولوگيالىق شەشىمدەردى دامىتۋ، ماڭىزدى ينفراقۇرىلىم مەن ونەركاسىپتى قورعاۋ، قازاقستاندا وزىق كيبەرقاۋىپسىزدىك جۇيەلەرىن ەنگىزۋ مۇمكىندىكتەرى تالقىلاندى.
بۇدان بىلاي قازاقستاندىق دەلەگاسيا وكىلدەرى اقش-تىڭ سۋ تەحنولوگيالارى سالاسىنداعى جەتەكشى كومپانياسى «Xylem»-مەن كەزدەسۋ وتكىزدى. اتالعان كەزدەسۋ سۋ رەسۋرستارىن باسقارۋ، سۋ تازارتۋ جانە ساپاسىن باقىلاۋدىڭ يننوۆاسيالىق جۇيەلەرىن ەنگىزۋ بويىنشا بىرلەسكەن باستامالاردى تالقىلاۋعا ارنالدى. قازاق تاراپى سۋمەن جابدىقتاۋ جانە سۋ بۇرۋ ينفراقۇرىلىمىن جاڭعىرتۋ ءۇشىن «Xylem» كومپانياسىنىڭ وزىق شەشىمدەرىن پايدالانۋعا مۇددەلىلىك تانىتتى.
كەزدەسۋلەردىڭ قورىتىندىسى بويىنشا ع.وسپانكۇلوۆ امەريكالىق كومپانيالارمەن ينۆەستيسيالىق ىنتىماقتاستىقتى تەرەڭدەتۋگە دايىندىعىن راستاپ، امەريكالىق تاراپقا نەگىزگى سالالاردا جوبالاردى ىسكە اسىرۋ ءۇشىن قولايلى جاعدايلار مەن ءتيىمدى قولداۋ تەتىكتەرىن ۇسىندى.