الماتىدا جاس مۋزىكانتتاردان قۇرالعان DA Musiq Orchestra الەمگە ايگىلى كومپوزيتور حانس سيممەردىڭ شىعارمالارىنان ەرەكشە كونسەرت ۇيىمداستىردى. ايگىلى فيلمدەردىڭ ساۋندترەكتەرىن تىڭداۋ كەش قوناقتارىنا تەرەڭ اسەر بەرىپ، ونەرپازداردىڭ جوعارى دەڭگەيدەگى ورىنداۋشىلىق شەبەرلىگىنە كۋا بولدى.
الماتىنى سازدى اۋەنمەن تەربەگەن كەش قۇرمانعازى اتىنداعى قازاق ۇلتتىق كونسەرۆاتورياسىنىڭ جانىنداعى كۇلاش بايسەيىتوۆا اتىنداعى مامانداندىرىلعان مۋزىكالىق مەكتەپتە ءوتتى. كونسەرت بارىسىندا حانس سيممەردىڭ 12 تۋىندىسى تارتۋ ەتىلدى.
جاس تالانتتاردان قۇرالعان ەرەكشە وركەستر
DA Musiq Orchestra جەتەكشىسى ءارى نەگىزىن قالاۋشى دامياني مىرزاعالييەۆ نە ءۇشىن بۇل تۋىندىلار تاڭدالعانى تۋرالى ءتۇسىندىردى. «بۇل فيلمدەردىڭ كورەرمەندەرى ءالى دە كوپ، ولاردىڭ ەسىندە بۇل ساۋندترەكتەرى ماڭگىگە ساقتالىپ قالعان. تىڭدارماندار كونسەرت كەزىندە سۇيىكتى فيلمدەرىنىڭ اتموسفەراسىنا قايتا ورالىپ، ەرەكشە اسەر الادى. سوندىقتان ءبىز دە حانس سيممەر شىعارمالارىن تاڭدادىق. بۇل كەشتە كورەرمەندەر “ينتەرستەللار” فيلمىنە جازىلعان تانىمال كومپوزيسيانى تىڭداي الدى. سونىمەن قاتار، كونسەرت باعدارلاماسىنداعى كەيبىر مۋزىكالىق شىعارمالارعا ءوزىم وڭدەۋ جاسادىم”، – دامياني مىرزاعالييەۆ.
جاس تالانتتاردان قۇرالعان ەرەكشە وركەستر DA Musiq Orchestra – ءارتۇرلى جاستاعى جاس مۋزىكانتتاردى بىرىكتىرگەن ەرەكشە سيمفونيالىق جانە حور ۇجىمى. وركەستر قۇرامىندا 5-سىنىپ وقۋشىلارىنان باستاپ، كونسەرۆاتوريانىڭ 1-كۋرس ستۋدەنتتەرىنە دەيىنگى ونەرپازدار بار. بۇل – ولاردىڭ اتالمىش مەكتەپ قابىرعاسىندا وتكىزگەن ەكىنشى كونسەرتى.
كورەرمەننىڭ ىستىق ىقىلاسى
DA Musiq Orchestra-نىڭ كەزەكتى كونسەرتىنە جينالعان جۇرشىلىق زالدى تولتىردى. كەش قوناقتارىنىڭ قاتارىندا TAN Consulting اگەنتتىگىنىڭ جەتەكشىسى ايدا دوسايەۆا، “الاتاۋ اقپارات” مەديا حولدينگىنىڭ باس ديرەكتورى ەرجان قالىمباي ۇلى، Halyk Bank-تىڭ PR-قىزمەتىنىڭ باسشىسى گۇلميرا اربابايەۆا، Stan.kz اقپارات اگەنتتىگىنىڭ دامۋ جونىندەگى ديرەكتورى شىڭعىس مادىبەك، Interact Club Rotary International ۆولونتەرلىك ۇيىمىنىڭ جوبا مەنەدجەرى دۋلات دانيار دا بولدى.
كەش قوناقتارى جان تەبرەنتەرلىك اسەم مۋزىكادان اسەرلەرىن جاسىرا المادى. «ءبىراق بۇگىنگى كەشتىڭ ءجونى بولەك. ءبىز وسىنداي جاس تالانتتاردىڭ ءوسىپ كەلە جاتقانىن كورىپ، قۋانىپ وتىرمىز. كونسەرت بارىسىندا تەبىرەندىك، تولقىدىق، كوزىمىزگە جاس كەلدى. ورىنداۋشىلاردىڭ كاسىبيلىگى تاڭعالدىردى”، – دەيدى ەرجان قالىمباي ۇلى.
الەمگە كەڭ تانىمال ونەر تۋىندىلارىنان بەرىلگەن كونسەرت جاس ونەرپازداردىڭ كاسىبي دەڭگەيىنىڭ اسا جوعارى ەكەنىن تولىق تانىتتى. DA Musiq Orchestra بولاشاقتا جاڭا كونسەرتتەر ۇيىمداستىرىپ، تىڭدارماندارىن اسەرلى اۋەندەرىمەن قۋانتا بەرمەك.
