ق ر قارجى مينيسترلىگى مەملەكەتتىك كىرىستەر كوميتەتى جالپىعا بىردەي بەلگىلەنگەن سالىق سالۋ رەجيمىندە جۇمىس ىستەيتىن كاسىپكەرلەر مەن كومپانيالاردى اكىمشىلەندىرۋدى جالعاستىرۋدا. بۇل رەتتە سالىقتىق مىندەتتەمەلەرىن دۇرىس ورىنداماي، ءوزارا ەسەپ ايىرىسۋ ارقىلى كىرىستەرىن تومەندەتەتىن سالىق تولەۋشىلەرگە ەرەكشە نازار اۋدارىلىپ وتىر. بۇل تۋرالى Aqshamnews.kz سايتى حابارلايدى.
جۇرگىزىلگەن تالداۋ ناتيجەسىندە 633 سالىق تولەۋشىگە كىرىستەرىن تومەندەتۋ بەلگىلەرى بويىنشا حابارلاما جىبەرىلگەن. ولاردىڭ قاتارىندا 172 قۇرىلىس سالاسىنداعى كومپانيالار (ونىڭ ىشىندە ءىرى قۇرىلىس كومپانيالارى دا بار)، 102 ساۋدا جانە باسقا دا قىزمەت تۇرلەرىمەن اينالىساتىن كاسىپورىندار بار.
بۇگىنگى تاڭدا، 12 ناۋرىزداعى مالىمەت بويىنشا، كاسىپكەرلەر قوسىمشا ەسەپتىلىك نىساندارىن تاپسىرىپ، سالىقتارىن تولىقتىرۋدا. ءقازىردىڭ وزىندە 17 ملرد تەڭگە سالىق تولەندى. بۇل تىزىمگە BI Group جانە BAZIS سياقتى ءىرى قۇرىلىس كومپانيالارى دا كىرىپ وتىر. مەملەكەتتىك كىرىستەر كوميتەتى دەرەكتەردى سالىستىرۋ جانە تەكسەرۋ جۇمىستارىن جالعاستىرۋدا.
سونىمەن قاتار، قۇرىلىس سالاسىندا جۇمىس ىستەيتىن ءبىرقاتار ءىرى كومپانيالار قارجىلىق اشىقتىقتى قامتاماسىز ەتۋ جانە كولەڭكەلى سحەمالاردى جويۋ ماقساتىندا سيفرلىق شەشىمدەردى ازىرلەۋگە جانە قارجىلاندىرۋعا باستاماشىلىق جاساۋدا.
ق ر قم مەملەكەتتىك كىرىستەر كوميتەتى بارلىق سالىق تولەۋشىلەردى سالىق زاڭناماسىنىڭ تالاپتارىن قاتاڭ ساقتاۋعا شاقىرادى. ەگەر جىبەرىلگەن حابارلامالار بويىنشا ءتيىستى شارالار قابىلدانباسا، سالىق ورگاندارى كەشەندى سالىقتىق تەكسەرۋلەر جۇرگىزۋ تۋرالى باستاما كوتەرەتىن بولادى.