بيىل ۇلتتىق مۋزىكالىق ونەر تاريحىندا وزىندىك ورىنعا يە قازاقستان كومپوزيتورى، قازاقستاننىڭ مەملەكەتتىك سىيلىعىنىڭ لاۋرەاتى، كسرو حالىق ءارتىسى سىدىق مۇحامەدجانوۆتىڭ (1924-1991) 100 جىلدىق مەرەيتويى اتالىپ وتۋدە. وسىعان بايلانىستى م.و.اۋەزوۆ اتىنداعى ادەبيەت جانە ونەر ينستيتۋتىنىڭ عالىمدارى «مۋزىكاتانۋ عىلىمىنداعى بەلگىلى تۇلعالار» اتتى دوڭگەلەك ۇستەل ۇيىمداستىرىپ، «سىدىق مۇحامەدجانوۆتىڭ شىعارماشىلىعى: ۋاقىت ەنشىسىندەگى عاسىرلار ءۇنى» اتتى جيناقتى جارىققا شىعارىپ، تۇساۋكەسەر ءراسىمىن وتكىزدى، دەپ حابارلايدى aqshamnews.kz
القالى جيىندى م.و.اۋەزوۆ اتىنداعى ادەبيەت جانە ونەر ينستيتۋتىنىڭ باس ديرەكتورى، فيلولوگيا عىلىمدارىنىڭ دوكتورى، ق ر ۇعا اكادەميگى كەنجەحان ءىسلامجان ۇلى ماتىجانوۆ باسقاردى.
دوڭگەلەك ۇستەلگە قازاقستاننىڭ ەڭبەك ەرى، جامبىل جابايەۆ جانە شىڭعىس ايتماتوۆ اتىنداعى حالىقارالىق سىيلىقتاردىڭ يەگەرى، قازاقستان رەسپۋبليكاسى مەن قىرعىزستاننىڭ ەڭبەك سىڭىرگەن قايراتكەرى، جازۋشى، كومپوزيتور، ونەرتانۋشى، سۋرەتشى ءىليا جاقانوۆ، حالىق جازۋشىسى، دراماتۋرگ، اقىن، حالىقارالىق «الاش» ادەبي سىيلىعىنىڭ يەگەرى سوفى قالىبەك ۇلى سماتاي، ق ر ءبىلىم بەرۋ ءىسىنىڭ قۇرمەتتى قىزمەتكەرى، قۇرمانعازى اتىنداعى قازاق ۇلتتىق كونسەرۆاتورياسىنىڭ قۇرمەتتى پروفەسسورى، دوسەنت، قۇرمانعازى وركەسترىنىڭ ارداگەرى وتەپبەرگەن حامزين، فيلوسوفيا، ساياساتتانۋ جانە ءدىنتانۋ ينستيتۋتىنىڭ «قازاق فيلوسوفياسى» سەكتورىنىڭ مەڭگەرۋشىسى، فيلوسوفيا عىلىمدارىنىڭ دوكتورى گاۋحار بارلىبايەۆا، مەركى اۋداندىق تاريحي-ولكەتانۋ مۋزەيىنىڭ ديرەكتورى ايدىن بازيلوۆ، قازاق ۇلتتىق ونەر ۋنيۆەرسيتەتىنىڭ پروفەسسورى، ق ر مادەنيەت سالاسىنىڭ ۇزدىگى، ونەرتانۋ دوكتورى، پروفەسسور دانا جۇنىسبەك قىزى جۇمابەكوۆا، قازاق ۇلتتىق ونەر ۋنيۆەرسيتەتىنىڭ پروفەسسورى، ق ر ەڭبەك سىڭىرگەن قايراتكەرى، ونەرتانۋ كانديداتى تويجان جىلقايدار قىزى ەگىنبايەۆا جانە م.و. اۋەزوۆ اتىنداعى ادەبيەت جانە ونەر ينستيتۋتىنىڭ مۋزىكاتانۋ ءبولىمىنىڭ مەڭگەرۋشىسى، ونەرتانۋ كانديداتى، قاۋىمداستىرىلعان پروفەسسور اينۇر قازتۋعانوۆا قاتىستى.
سونداي-اق، جيىنعا قۇرمانعازى اتىنداعى قازاق ۇلتتىق كونسەرۆاتورياسى مەن ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ وقىتۋشى وكىلدەرى دە كەلدى.
قالىڭ وقىرمانعا جول تارتقان ەڭبەكتە س.مۇحامەدجانوۆتىڭ قالامىنان تۋعان ماقالالارىمەن بىرگە، كومپوزيتوردىڭ ءومىرى مەن شىعارماشىلىعى تۋرالى ماتەريالدار كورىنىس تاپقان.
كىتاپتىڭ العاشقى بولىمىندە س.مۇحامەدجانوۆتىڭ مەرزىمدى باسىلىمداردا جارىق كورگەن ماقالالارى جيناقتالىپ، العاش رەت وقىرماندارعا ۇسىنىلدى. ەكىنشى بولىمگە كومپوزيتوردىڭ شىعارماشىلىق ىزدەنىستەرى، جەتىستىكتەرى، سونداي-اق، اعا بۋىن كومپوزيتورلار مەن مۋزىكالىق قوعام تۋرالى پىكىرلەرى، تىلشىلەرگە بەرگەن سۇحباتتارى ەندى.
ءۇشىنشى بولىمدە س.مۇحامەدجانوۆتىڭ ءومىرى مەن شىعارماشىلىق جولىنا، جەكە تۋىندىلارىنىڭ كوركەمدىك قۇندىلىعىنا قىزىعۋشىلىق تانىتقان جازۋشىلار (م.الىمبايەۆ، س.سماتاي، ءى.جاقانوۆ)، مۋزىكاتانۋشىلار (م.احمەتوۆا، ج.رسالدين، ا.كەلبەرگ جانە ت.ب.) جانە كومپوزيتورلاردىڭ (ل.حاميدي، ە.راحمادييەۆ جانە ت.ب.) ماقالالارى بەرىلگەن.
سونىمەن قاتار، كەيىنگى بۋىن زەرتتەۋشىلەردىڭ دە ەڭبەكتەرى جيناققا ەنگىزىلىپ، جاڭاشا زەرتتەۋلەردىڭ ناتيجەلەرى باياندالعان.
كىتاپتا سىدىق مۇحامەدجانوۆتىڭ مۋزىكالىق شىعارمالارىنان ۇلگىلەر جانە مۇراعاتتىق فوتوسۋرەتتەر بەرىلگەن. مەرەيتويلىق باسىلىم پوليگرافيالىق ساپاسى جاعىنان دا جوعارى دەڭگەيدە ورىندالعان.
ءىس-شارادا قازاقستان رەسپۋبليكاسىنىڭ ەڭبەك سىڭىرگەن قايراتكەرى گۇلنار شاحان قىزى جيديلوۆانىڭ سۇيەمەلدەۋىمەن اباي اتىنداعى قازاق مەملەكەتتىك وپەرا جانە بالەت تەاترىنىڭ جاس سوليستەرى س.م.مۇحامەدجانوۆتىڭ اندەرى مەن وپەراسىنان ۇزىندىلەر ورىندادى.
بۇل ەڭبەك ونەر، مادەنيەت، تاريح سالاسىنىڭ ماماندارىنا، وقۋ ورىندارىنىڭ ءبىلىم الۋشىلارىنا جانە جالپى جۇرتشىلىققا ارنالعان. كومپوزيتور سىدىق مۇحامەدجانوۆتىڭ شىعارماشىلىعىنا ارنالعان تۇڭعىش ەڭبەكتىڭ وقىرماندارى كوپ بولادى دەپ سەنەمىز.