دروندار شوۋى رەسپۋبليكا كۇنىن مەرەكەلەۋ اياسىندا الماتىلىقتاردى قۋانتپاق
قازاقستان رەسپۋبليكاسى كءۇنى وراي 2024 جىلى 25 قازاندا ساعات 21.00-دە اباي الاڭىندا، رەسپۋبليكا سارايىنىڭ (دوستىق داڭعىلى، 56) الدىندا جانە 21.30-دا «استانا» الاڭىندا دروندار شوۋى وتەدى، دەپ حابارلايدى aqshamnews.kz
ءىس-شارا رەسپۋبليكا كۇنىنە ارنالعان مەرەكەلىك ءىس-شارالاردىڭ ءبىرى بولىپ، قالا تۇرعىندارى مەن قوناقتارى ءۇشىن تاڭعاجايىپ كورىنىس ۇسىنادى. شوۋ شامامەن 20 مينۋتقا سوزىلىپ، الماتىنىڭ اسپانى جارقىراعان تاماشا قويىلىمعا اينالادى.
دروندار شوۋىنىڭ ۇيىمداستىرۋشىلارى 500-دەن استام دروندى اسپانعا ۇشىرىپ، ۇلتتىق مادەنيەت ەلەمەنتتەرى مەن ەل تاريحىنداعى ماڭىزدى ساتتەردى بەينەلەيتىن ۆيزۋالدى 3D بەينەلەرىن جاسايتىن ەرەكشە باعدارلاما دايىنداعان. جارىق قوندىرعىلارىن ۇلتتىق بىرلىك پەن ماقتانىش رۋحىن ايقىندايتىن مۋزىكالىق شىعارمالار سۇيەمەلدەيدى.
دروندار شوۋى مەرەكەنى تويلاۋدىڭ يننوۆاسيالىق ءتاسىلى رەتىندە قازاقستاننىڭ تەحنولوگيالىق دامۋ مەن ەكولوگيالىق باستامالارعا دەگەن تالپىنىسىن كورسەتەدى. ءداستۇرلى وتشاشۋدىڭ ورنىنا درونداردى پايدالانۋ بىرەگەي ۆيزۋالدى ەففەكت قانا ەمەس، سونىمەن قاتار قورشاعان ورتاعا اسەردى ازايتۋعا مۇمكىندىك بەرەدى. شوۋ قاۋىپسىزدىك تالاپتارىن ساقتاي وتىرىپ ۇيىمداستىرىلعان.
بۇعان قوسا، 25 قازان كۇنى ساعات 20.00-دە رەسپۋبليكا كۇنىنە وراي كوكتوبە تەلەمۇناراسىندا مەرەكەلىك ساۋلەتتىك جارىقتاندىرۋ قوسىلادى. ەستەرىڭىزگە سالا كەتەيىك، تەلەمۇنارانىڭ جارىقتاندىرۋ جۇيەسى 30 تامىزدا ىسكە قوسىلىپ، الماتىنىڭ جاڭارتىلعان ساۋلەتتىك جارىقتاندىرۋ ەلەمەنتتەرىنىڭ بىرىنە اينالدى.