عاسىرعا جۋىق مەرزىمدى كەرى شەگەرسەك، قازاق كينوسىنىڭ كينو الەمىنە اۋپىرىمدەپ قادام باسقان كەزەڭىنە تابان تىرەيمىز. البەتتە، كينو الەمىنە نىق-نىق قادامدار جاساپ، سول الەمدە تاڭبا قالدىرۋ وسى سالانىڭ ۇشىنان ۇستاعاندار ءۇشىن وتە قيىن بولدى. ونەردىڭ التىن ساندىعى ىسپەتتەس قازاقتىڭ كينو ونەرى ءوز جەڭىسىن قازان توڭكەرىسىنەن كەيىن باستادى. العاش رەت 1938 جىلى "لەنفيلم" كينوستۋدياسىندا تۇسىرىلگەن "امانگەلدى" ءفيلمى كوگىلدىر ەكرانعا جول تارتتى. سونداي-اق فيلم ەڭ العاشقى بەلگىلى تۇلعاعا ارناپ تۇسىرىلگەن تۋىندى ەدى. بۇل فيلمنەن كەيىن دە قازاق كينو قورجىنى ەنشىسىن كورەرمەن كوزايىمىنا اينالعان تالاي كينوتۋىندىلارمەن مايلادى.
بۇگىنگى جاڭا ارتىستەر، جاڭا كينولار، جاڭا رەجيسسەرلەر وتكەن كۇننىڭ ەلەسىنە اينالعان عاسىر بۇرىنعى تۋىندىلاردىڭ ءىزىن سۋىتپاي، قىل كوپىرىن جالعاپ كەلەدى. ارينە، بۇل قازاق كينوسىنىڭ بەلگىلى دارەجەگە يە ەكەنىنىڭ ايعاعى. العاشقى فيلمدەر 1925-1946 جىلدار ارالىعىندا ءتۇسىرىلدى. كەيىن "قازاقفيلم" كينوستۋدياسىنىڭ تۇسىرۋىمەن 1972 جىلى سۇلتان قوجىقوۆتىڭ تولىقمەتراجدى "قىز جىبەك" كوركەم ءفيلمى ءوز كورەرمەنىمەن قاۋىشتى. مىنە، وسىلايشا، وتاندىق فيلمدەر ءبىر ارنادا توعىستى. بۇل جىلداردى تاعى كەرى شەگەرسەك، 1991 جىلدان بەرى قاراي جارىققا شىققان تۋىندىلاردىڭ ءدوپ ۇستىنەن تۇسەمىز. ءدال وسى ۋاقىتتان بەرىگە دەيىن قازاق كينوسى جاڭا وركەندەۋ باسپالداعىنا كوتەرىلگەندەي.
تاۋەلسىزدىك العاننان كەيىن قازاقستانداعى كينوستۋديالاردىڭ سانى دا ەداۋىر ءوستى. مەملەكەت ەندى عانا اياعىنان تۇرىپ جاتقاندا، ونەردىڭ بۇل سالاسى بىردە شەتكەرى، بىردە ىلگەرى ءجۇرىپ جاتتى. تۋىندىلاردىڭ جارىققا شىعۋىنا ەڭ ۇلكەن كەدەرگى كينوستۋديالاردىڭ شىعىنعا ۇشىراۋى ەدى. جەكەمەنشىك كينوستۋديالار وزدەرىن قاراجاتپەن قامتاماسىز ەتە الماعان سوڭ، مەملەكەت تە ايانىپ قالمادى. سونىڭ ارقاسىندا تەك اۆتورلىق فيلمدەردى ۇسىنىپ جۇرگەن كينوستۋديالار، ءتۇرلى جانرداعى فيلمدەردى دە تۇسىرۋگە قول جەتكىزدى. وسىدان كەيىن مەملەكەت پەن كينوستۋديالار ارنايى كەلىسىمشارت جاساسىپ، كينو ءوندىرىسىنىڭ دامۋىنا ايتارلىقتاي قولداۋ كورسەتتى.