قازاق اعايىندار ەلگە كەلۋدە
اۋعانستاننان 35 ەتنيكالىق قازاق قازاقستانعا ەۆاكۋاسيالاندى، دەپ حابارلايدى Almaty-akshamy.kz Qazaqtv.com cايتىنا سىلتەمە جاساپ.
قانداستارىمىزدى اتامەكەنگە قايتارۋ مەملەكەت باسشىسى قاسىم-جومارت توقايەۆتىڭ تاپسىرماسىمەن جۇزەگە اسىرىلدى. قورعانىس مينيسترلىگىنىڭ ارنايى ۇشاعى كابۋلدان ۇشىپ شىعىپ، الماتى اۋەجايىنا قوندى.
جولاۋشىلاردىڭ بارلىعى كارانتيندىك شارالاردى ءوتۋ ءۇشىن وقشاۋلاۋ ورتالىعىنا جەتكىزىلدى. رەيس «تاليبان» قوزعالىسىنىڭ كەلىسىمىمەن جۇزەگە استى، دەپ حابارلايدى ەلىمىزدىڭ سىرتقى ىستەر مينيسترلىگى. ءقازىر كابۋل قالاسىنداعى قازاقستاننىڭ ەلشىلىگى قالىپتى رەجيمدە جۇمىس ىستەپ جاتىر.
ديپلوماتتار اۋعان جەرىندەگى قانداستارمەن تۇراقتى بايلانىستا. ولاردىڭ ۇلتىن راستاۋ جۇمىستارى جالعاسۋدا.
«الماتى اۋەجايىنا اۋعانستان اۋماعىنان ەتنيكالىق قازاقتاردىڭ ءبىرىنشى لەگى كەلىپ قوندى. ءوزىمىزدىڭ قانداستاردى اۋعانستاننان شىعارۋ مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس، سىرتقى ىستەر مينيسترلىگىنىڭ ۇيىمداستىرۋىمەن جانە قازاقستان رەسپۋبليكاسىنىڭ كابۋلداعى ەلشىلىگىنىڭ قولداۋىمەن بولعان ەدى»، - دەدى «وتانداستار» قورىنىڭ ۆيسە-پرەزيدەنتى ماعاۋيا سارباسوۆ.
سونىمەن قاتار حاسان دەرمان ەسىمدى قانداسىمىز ريزاشىلىعىن ءبىلدىردى.
«ماعان كومەكتەسىپ، قولداپ كەلگەندەرىڭىز ءۇشىن ۇلكەن راحمەت! قازاقستان پرەزيدەنتىنە، وزگە دە قول ۇشىن بەرىپ كومەكتەسكەندەرگە، جۋرناليستەرگە، اۋعانستانداعى ەلشىلىككە العىسىم شەكسىز. امان بولىڭىزدار! اتامەكەنگە، تاريحي وتانىمىزعا كەلگەنىمىزگە قۋانىشتىمىز. جۇبايىم كەلە المادى. پاسپورتى جوق»، - دەدى ول.