بۇدان بۇرىن مارقۇمداردىڭ ءاتى-جونى جازىلعان ءتىزىمدى جاريالاعانبىز.
قارالى جىر
«جومارت» كەن ورنىنداعى ءۇيىندى استىنان جەتى جۇمىسشىنىڭ دەنەسى تابىلدى. =اقپاراتتان=
«جومارت» تا مەنىڭ اۋىلىم ەدى،
باۋىرىم ەدى جەتى ارىس.
قايعى كەپ ءتۇردى تاعى دا ىرگەنى،
قىرسىقتىڭ بولسىن بەت الىس.
قوبىز دا شالعان،
كەيدە ولەڭ ايتقان،
سارىارقا بەلى،
ساياڭ نۇر.
... جوشى قازاسىن كۇيمەنەن ايتقان
كەتبۇعا بابام،
ويان ءبىر!
بىلەدى دەيسىڭ ءومىرى ۇقپاعان،
اجالدىڭ مىناۋ كىم سىرىن؟
جەتى قات جەردە كومىلىپ قالعان
جەتى ارىس،
جەتى قىرشىنىم!
ەي، جاڭاارقام،
كوكتى جاڭعىرتاسىڭ با،
وپاتتان وعلان وزعاسىن...
ۇلىتاۋىمنىڭ تارعىل تاسىنا
تارامداپ اققان كوز جاسىم.
ءبىر بيىك بولىپ تۇرسىڭ، ەدىگە،
شالا دا جانسار ءبىر كەزدەر...
كۇڭگىرىتتەۋ ۇنمەن كۇرسىنەدى مە
كۇڭگىر دە كۇڭگىر كۇمبەزدەر؟!
تارىلتقانىڭ با،
ءورىستى كۇنىم،
شاتىلماس جەردە شاتىلىپ.
سارىسۋ مەن كەڭگىر كورىستى بۇگىن.
اقپاننىڭ ايى اھ ۇرىپ...
تورگە وزعاندارى توڭىرەگىمنىڭ،
كۇيىس قايىرعان قوداستاي...
جانارىن ءسۇرتشى،
مەنىڭ ەلىمنىڭ –
قايعىدان تۇرعان كوز اشپاي!
عالىم جايلىباي، اقىن، حالىقارالىق «الاش» ادەبي سىيلىعىنىڭ لاۋرەاتى.