قاتەرلىك ىسىك پەن وكپە اۋرۋلارىنان الماتى الەمدە الدىڭعى ورىنداردا تۇر

ەكوبەلسەندىلەردى الماتى اۋاسىنىڭ لاستانۋى الاڭداتىپ وتىر

ەكولوگيا بەلسەندىلەرى الماتى قاتەرلى ىسىك، وكپە اۋرۋلارى بويىنشا الەمدە الدىڭعى قاتاردا تۇر دەپ دابىل قاعۋدا. مۇنىڭ باستى سەبەبى – اۋا باسسەينىنىڭ لاستانۋى. قالىڭ قارا ءتۇتىن الماتى اسپانىن تورلاپ تۇرادى، دەپ حابارلايدى Almaty-akshmy.kz 

زياندى زاتتاردىڭ باسىم بولىگى اۆتوموبيلدەردەن شىعادى. سەبەبى – كوبى ەسكى.

ەكولوگيا دەپارتامەنتى ماماندارىنىڭ ايتۋىنشا، قوعامدىق كولىكتەر دە تولىعىمەن گازعا اۋىستىرىلماي وتىرعان كورىنەدى. 

«الماتىداعى جەكە تۇرعىن ءۇي سەكتورى تۇپكىلىكتى تابيعي وتىنعا اۋىسپايىنشا، قالانىڭ اۋاسى تازارمايدى. گازبەن جۇرەتىن قوعامدىق كولىك سانىن دا ءۇش ەسە ارتتىرۋ قاجەت»، – دەيدى ەكولوگتار.

ايتپەسە، كۇن سايىن قالانىڭ تىنىسى تارىلىپ، اۋا لاستانىپ بارادى. شاھاردا كوپ قاباتتى ءۇي قۇرىلىسى قارقىن العاندىقتان، جەلدەنۋ دە ناشارلاپ وتىر.

«الماتى قالاسىنىڭ كىرە بەرىستەرىندە 20-دان اسا ەكوپوست جۇمىس جاسايدى. ولاردىڭ جۇمىسى ءالى ءتيىمسىز. ويتكەنى كەيبىر جاۋاپتى ماماندار ول جەردە جۇمىسىن ءتيىستى دەڭگەيدە جاساماي جاتىر. كولىكتەردەن كوك ءتۇتىن، قارا ءتۇتىن بۋداقتاعان كولىكتەر، اسىرەسە، جۇك كولىكتەرى ارى-بەرى ساۋلاپ ءجۇر كۇندەلىكتى. الماتى قالاسىندا 700 مىڭنان اسا كولىك بار. ءبىزدىڭ ەسەبىمىزشە، 30 پايىزدان استامى ەكولوگيالىق تالاپتارعا سايكەس كەلمەيدى»، - دەيدى الماتى قالاسى بويىنشا مەملەكەتتىك ەكولوگيالىق ينسپەكتور دىنمۇحاممەد لەسبەكوۆ. 

4 جىل بۇرىن الماتى الەمدەگى ەڭ لاس 100 قالانىڭ قاتىرىنا ەندى. ال «قازگيدرومەت» مەكەمەسىنىڭ مالىمەتىنشە، قالانىڭ لاستانۋ يندەكسى 7 بالعا جەتتى. بۇل اتموسفەرالىق اۋانىڭ وتە ناشار ەكەنىن كورسەتەدى. الماتىنىڭ جوعارعى بولىگىنە بيىك ۇيلەر كوپ سالىنۋدا. ونداي عيماراتتار ونسىز دا ويپاتتا تۇرعان شاھاردىڭ اۋا الماسۋ پروسەسىنە كەدەرگى جاسايدى. تۇرعىندار تاراپىنان ارىز-شاعىم ءجيى ايتىلعانىمەن، جاعداي جاقسارماي وتىرعانى قىنجىلتادى.

 الماتىدا جىلىنا 122 مىڭ توننا زياندى قالدىق اۋاعا تارايدى. ەكولوگيانى جاقسارتۋ ءۇشىن «جول كارتاسى» ازىرلەنىپ، كوگالداندىرۋدى ۇلعايتۋ جوسپارى بەكىتىلدى. الداعى ەكى جىلدا قالادا 3 ملن كوشەت وتىرعىزىلماق.

«دەگەنمەن كولىك اعىنىن رەتتەمەي، ەكولوگيالىق بەكەت جۇمىسىن قاتاڭداتپاي، قۇرىلىستى ساۋاتتى جۇرگىزبەيىنشە، ماسەلە شەشىلمەيدى»، - دەيدى ەكولوگتور.