بەلگىلى ادەبيەت سىنشىسى ءارى رەجيسسەر عالىم دوسكەن ومىردەن ءوتتى، - دەپ حابارلايدى Aqshamnews.kz ءتىلشىسى.
بەلگىلى فيلولوگ، ادەبيەت زەرتتەۋشىسى، رەجيسسەر جانە سەناريست عالىم دوسكەن دۇنيەدەن ءوتتى. ول 1960 جىلدىڭ 19 شىلدەسىندە تۋعان.
عالىم دوسكەن اباي اتىنداعى قازاق پەداگوگيكالىق ينستيتۋتىن ءتامامداعان. ەڭبەك جولىندا وتاندىق تەلەونەر مەن مادەنيەتكە ايتارلىقتاي ەڭبەك ءسىڭىردى. 2001–2002 جىلدارى «قازاقستاننىڭ رەسپۋبليكالىق تەليەۆيدەنيە جانە راديو كورپوراسياسى» جاق باسقارما ءتوراعاسىنىڭ ءبىرىنشى ورىنباسارى، 2002–2006 جىلدارى «قازاقستان» رترك باسقارما ءتوراعاسى قىزمەتىن اتقاردى. 2007 جىلدان بەرى «ەل» پروديۋسەرلىك ورتالىعىنىڭ كوركەمدىك جەتەكشىسى بولدى.
ول «ساۋلەنى كۇتۋ»، «ۇلى دالا استانالارى»، «ماڭعىستاۋ قابىرلەرىنىڭ ءتۇسى»، «جوعالعان جارىق حرونيكاسى» سىندى دەرەكتى فيلمدەردىڭ، «توعىز قۇيرىقتى اق تۇلكى»، «سيقىرلى فلەيتا»، «بيلەيتىن قۇس» كىتاپتارىنىڭ اۆتورى. سونىمەن قاتار «جەزتىرناق» بالەتىنىڭ ليبرەتتوسىن جازعان.
قازاق مادەنيەتىنە، تەلەجۋرناليستيكاسىنا جانە ادەبيەتىنە ولشەۋسىز ۇلەس قوسقان تالانتتى تۇلعانىڭ قازاسى ەل ءۇشىن ۇلكەن قايعى بولدى. مارقۇمنىڭ تۋعان-تۋىستارىنا، جاقىندارىنا كوڭىل ايتامىز.