قازاقستاننىڭ ەڭبەك كودەكسىندە قاشىقتان جۇمىس ىستەۋ مۇمكىندىگى كوزدەلگەن.
ەڭبەك جانە حالىقتى الەۋمەتتىك قورعاۋ مينيسترلىگى مۇنداي جۇمىس كەستەسى كىمدەرگە بەلگىلەنەتىنىن جانە قالاي راسىمدەلەتىنىن ءتۇسىندىردى، - دەپ حابارلايدى Aqshamnews.kz
قىزمەتكەر دە، جۇمىس بەرۋشى دە قاشىقتان جۇمىس ىستەۋگە كوشۋ تۋرالى باستاما كوتەرە الادى. ەڭبەك كودەكسىندە قاشىقتان جۇمىس ىستەي الاتىن ادامدار توبى ناقتى كورسەتىلمەگەندىكتەن، مۇنداي رەجيم كەز كەلگەن قىزمەتكەرگە قولدانىلۋى مۇمكىن. ءبىراق كوبىنە بالا كۇتەتىن ادامدارعا، ۋاقىتشا ەڭبەككە جارامسىز ادامدارعا، شالعاي ەلدى مەكەندەردە تۇراتىندارعا جانە تاعى باسقا جاعدايلاردا بەلگىلەنەدى.
«قاشىقتان جۇمىس ىستەيتىن قىزمەتكەرلەر ءۇشىن ەڭبەك شارتىندا نەمەسە جۇمىس بەرۋشىنىڭ اكتىسىندە بەلگىلەنگەن جۇمىس ۋاقىتىنىڭ كۇندەلىكتى ۇزاقتىعىنا، باقىلاۋ ەرەكشەلىكتەرىنە شەكتەۋلەر ساقتالا وتىرىپ، جۇمىس ۋاقىتىنىڭ تۇراقتى ەسەبى بەلگىلەنەدى. قاشىقتا جۇمىس ىستەگەنى ءۇشىن ەڭبەكاقى قىزمەتكەردىڭ بىلىكتىلىگىنە، ورىندالاتىن جۇمىستىڭ كۇردەلىلىگى مەن ساپاسىنا قاراي ەڭبەك شارتتارىندا جانە جۇمىس بەرۋشىنىڭ اكتىسىندە كوزدەلگەن جۇمىس كولەمى اياقتالعاننان كەيىن تولىق كولەمدە تولەنەدى»، - دەپ ءتۇسىندىردى مينيسترلىكتىڭ مەملەكەتتىك ەڭبەك ينسپەكسياسى كوميتەتىنىڭ باس ساراپشىسى بيبارىس تاڭىربەرگەن ۇلى.
ەگەر توتەنشە نە اسكەري جاعداي، كارانتين نەمەسە قىزمەتكەردىڭ دەنساۋلىعىنا ءقاۋىپ توندىرەتىن باسقا دا ەرەكشە جاعدايلار بولسا، جۇمىس بەرۋشى ۋاقىتشا قاشىقتان نەمەسە ارالاس جۇمىس رەجيمىن ەنگىزە الادى. بۇل رەتتە قىزمەتكەردى جۇمىس ىستەۋ ءۇشىن قاجەتتى جابدىقتارمەن، اقپاراتتىق تەحنولوگيا قۇرالدارىمەن، بايلانىس قىزمەتتەرىمەن جانە باسقا دا قۇرالدارمەن قامتاماسىز ەتۋ، سونداي-اق شىعىنداردى وتەۋ جۇمىس بەرۋشىنىڭ اكتىسىمەن ايقىندالادى.