ءۇندىستان استاناسى نيۋ-دەليدەگى ايگىلى تۋريستىك ايماقتا اۆتوكولىك جارىلىپ، قايعىلى جاعداي تىركەلدى، - دەپ حابارلايدى اqshamnews.kz ءتىلشىسى.
وقيعا سالدارىنان سەگىز ادام كوز جۇمىپ، تاعى 24 ادام ءتۇرلى جاراقات العان.
جارىلىس مەترونىڭ «قىزىل قامال» («Red Fort») ستانسياسى ماڭىندا بولعان. كۋاگەرلەردىڭ ايتۋىنشا، Hyundai i20 كولىگى وتالىپ جارىلعاننان كەيىن ماڭىنداعى بىرنەشە اۆتوكولىككە دە وت تيگەن.
اتالعان اۋدان – نيۋ-دەليدەگى ەڭ كوپ تۋريست باراتىن ورىنداردىڭ ءبىرى. بۇل جەردە ەلدىڭ تاريحي مۇراسى سانالاتىن ايگىلى لال-كيلا (قىزىل قامال) سيتادەلى ورنالاسقان. جارىلىس بولعان ۋاقىتتا اۋماقتا تۋريستەر كوپ بولعانى ايتىلادى.
ءۇندىستاننىڭ ىشكى ىستەر ءمينيسترى اميت شاح وقيعانىڭ بارلىق مۇمكىن نۇسقاسى تەكسەرىلىپ جاتقانىن مالىمدەدى. جارىلىستىڭ ناقتى سەبەبى ازىرگە بەلگىسىز. الدىن الا دەرەك بويىنشا، كولىك نە تۇراقتا تۇرعان، نە باعدارشامدا توقتاعان كەزدە جارىلعان بولۋى مۇمكىن.
بۇقارالىق اقپارات قۇرالدارىنىڭ ءبىرى NDTV باستاپقىدا 13 ادامنىڭ قازا بولعانىن حابارلاعان، الايدا بۇل اقپاراتتى رەسمي ورگاندار راستاعان جوق.
وقيعا ورنى تولىقتاي قورشاۋعا الىنىپ، نيۋ-دەليدە جوعارى دايىندىق رەجيمى ەنگىزىلدى. قاۋىپسىزدىك شارالارى بۇكىل ەل بويىنشا كۇشەيتىلدى. سونداي-اق جارىلعان كولىكتىڭ بۇرىنعى يەسى تەرگەۋ اياسىندا قاماۋعا الىنعانى بەلگىلى بولدى.