الەۋمەتتىك جەلىدە بىرنەشە ۆيدەولاردان ەرەكشە وبرازداعى الماتىلىق جىگىتتىڭ بەينەسىن كورگەن بولارسىز. سىرت كەلبەتىنە قاراپ وزگە ۇلت وكىلى دەپ باعا بەرگەن جاندار، ونىڭ دومبىرانىڭ قۇلاعىندا ويناپ، ابايدىڭ قارا ءسوزىن جاتقا بىلگەنىنە تاڭعالعاندارىن جاسىرمادى. ەرەكشە كەيىپتەگى "ەركىندىكتىڭ" سيمۆولىنا اينالعان ءجاسوسپىرىم كىم؟ اqshamnews.kz ءتىلشىسى جۇرت نازارىنداعى جەتكىنشەكتى تاۋىپ، تىلدەستى.
"قانىم ورىس بولسا دا، جانىم - قازاق"
ۆاديم تراۆين - الماتى وبلىسى، نۇرعيسا تىلەندييەۆ اتىنداعى قاراپايىم اۋىلدىڭ تۋماسى. ۇلتى - ورىس. دەسە دە، بولمىسىم، جانىم، الەمىم قازاق دەيدى ول. ءقازىر اۋىلىنداعى ورتا مەكتەپتە 11-سىنىپ وقىپ جاتىر.
"مەنى جاي عانا "ۆاديا" دەپ اتاعان ۇنايدى. سولاي جاعىمدىراق. كىلەڭ بەسكە وقيمىن. پاندىك وليمپيادالارعا ءجيى قاتىسامىن: تىلدەر، روبوتوتەحنيكا، قىسقاسى ەرەكشە سالالاردىڭ كوبى قىزىقتىرادى. قانىم ورىس بولسا دا، جانىم - قازاق. ءوز ەلىمنىڭ مادەنيەتى مەن تاريحىن ەرەكشە قۇرمەتتەيمىن"،- دەيدى ول.
"سىرت كەلبەت ەمەس، ىشكى الەم ماڭىزدى"
ءۆاديمدى كورگەن جان بىردەن ونىڭ ەرەكشە ستيلىنە كوز تاستايدى. راسىندا، ءبىر قاراعاندا الەمى باسقا، ۇلتتىق قۇندىلىقتان ادا جان سەكىلدى كورىنگەنىمەن، ءۆاديمنىڭ ۇستانىمى، ومىرگە دەگەن كوزقاراسى ەرەكشە. ول كىتاپ وقىعاندى، جاڭا دۇنيەلەردى زەرتتەگەندى، شىعارماشىلىقتى جانى سۇيەدى.
"قازىرگى ءستيلىم بۇرىنعى ءبىر سەريالداعى كەيىپكەردىڭ كوسپلەيىنەن باستالدى. ءبىراق ۋاقىت وتە كەلە ول تولىقتاي مەنىڭ بەينەمە اينالدى. بۇل ءبىر جاعىنان ماركەتينگ، ءبىر جاعىنان ىشكى بوستاندىقتىڭ كورىنىسى. ادامدار كەيدە سىرت كەلبەتىمە قاراپ قاتە ويلايدى: بىرەۋ “ساتانيست”، بىرەۋ “ناركومان” دەيدى. ال جاقىنىراق تانىسقاندا ناعىز شىعارماشىلىققا بەرىلگەن، مۋزىكانى سۇيەتىن، پاتريوت ەكەنىمدى كورەدى. بۇل دا كىشكەنتاي الەۋمەتتىك ەكسپەريمەنت: "سىرتىنان قاراپ تون پىشپە" دەگەندى جەتكىزگىم كەلەدى"، - دەيدى جاس ورەن.
حاكىم اباي مەن ءۆاديمدى نە بايلانىستىرادى؟
جوعارىدا ايتقانىمىزداي، ۆاديم كىتاپ دەسە ىشكەن اسىن جەرگە قوياتىن جان. اسىرەسە جيۋل ۆەرننىڭ شىعارمالارىن جاقسى كورەتىنىن ايتتى. كوبىنە كوركەم ادەبيەتپەن اۋەستەنەتىن ۆاديا كىتاپتىڭ ەموسيانال ينتەللەكتىن قالىپتاستىرۋعا اسەرى مول بولعانىن، اسىرەسە اباي قۇنانباي ۇلىنىڭ شىعارماشىلىعىن ەرەكشە كورەتىنىن جاسىرمادى.
"ابايدى" باسىندا اسا تۇسىنبەگەندىكتەن قابىلداي المادىم. پاندىك وليمپيادا ءۇشىن جاتتاتقىزعان كەزدە ءتىپتى جەك كورگەنمىن. ءبىراق كەيىن ول ماعان "ءوزى" جاقىندادى. ابايدىڭ قارا سوزدەرىمەن تانىسىپ، ابايتانۋشىلارمەن سويلەسكەننەن كەيىن ونىڭ ويلارى بۇگىنگى كۇنگە دە ءدال كەلەتىنىن ۇقتىم. ماعان ەڭ جاقىنى - جەتىنشى ءسوز. وندا ادام بالاسىنىڭ بالالىق تازالىقتى جوعالتقاندا عانا رۋحاني قۇلدىرايتىنى ايتىلادى. ال مەن ءومىر بويى "سول بالانى" جوعالتپاۋعا تىرىسامىن"، - دەپ قوستى ول.
ەستەرىڭىزدە بولسا، ءۆاديمنىڭ الەۋمەتتىك جەلىدە كوشەدە كەتىپ بارا جاتقان ساۋالناما الۋشىلاردىڭ بىرىنە ابايدىڭ قارا ءسوزىن وقىپ بەرگەن ۆيدەوسى كوپ قارالىم جيناعان ەدى. جۇرت ونىڭ سىرت كەلبەتىنە قاراپ، قارا ءسوزدى جاتقا ايتىپ بەرەدى دەپ ويلاماعاندارىن ايتتى.
ەلەكترلى دومبىرانى ويلاپ تاپقان تۇڭعىش وقۋشى
ۆاديم تراۆين ەلەكترلى دومبىرا ويلاپ تاپقانىمەن دە ەرەكشەلەنەدى. ول ءوزىنىڭ پاراقشاسىندا تاجىريبە جاساپ، دومبىرانى زامانۋي ىرعاققا سالىپ كورگەنىن بولىسكەن ەدى. كەيىن ول بەينەلەرى بىرنەشە ميلليون قارالىم جيناپ، كوپتىڭ نازارىن اۋداردى. ال ءۆاديمنىڭ ءوزى ۇلتتىق اسپاپقا دەگەن ماحابباتى قالاي پايدا بولعانىن اڭگىمەلەپ بەردى.
"دومبىرامەن العاش 4-سىنىپتا تانىستىم. ءبىراق ۇيىرمەگە قاتىسۋعا قارجىم بولمادى. "دومبىرادا ويناۋ" دەگەن ارمانىم سول كۇيى قالىپ قويعان. كەيىن 8-سىنىپتا ەڭبەك ساباعىندا ۇستازىم ەسكى دومبىرانى جوندەپ جاتقانىن كوردىم. ارمانىمدى ايتتىم. كەلەسى ساباقتا ول سول دومبىرانى ماعان سىيلادى. سودان باستاپ ءوزىم ۇيرەنىپ الدىم. كەيىن دومبىراعا روك ستيلىندە ءۇن قوسۋدى ءجون كورىپ، تاجىريبە جاساپ كوردىم. مۇنىم كوبىنە ۇناعانداي بولدى"، - دەيدى ۆاديا.
ءقازىر ۆاديم دومبىرا عانا ەمەس، گيتارا، فلەيتا سەكىلدى جالپى 9 ءتۇرلى مۋزىكالىق اسپاپتا وينايدى.
شىعارماشىلىق جول جانە اباي تۋرالى تۇسىنىك
ۆاديم ءوزىنىڭ ىشكى الەمىنەن سىر شەرتىپ، شىعارماشىلىق كوزقاراسى جايلى وي ءبولىستى. ءوزىنىڭ ەرەكشە تۇلعاسىن قالىپتاستىرۋ جولىندا جۇرگەن ول، كەلەشەگىن شىعارماشىلىق الەمنەن كورەتىنىن ايتتى.
"جاس بولسام دا مەن كوپ جەردە جۇمىس ىستەپ كوردىم. ءبىراق ءبىر نارسەنى انىق ءتۇسىندىم. تاڭەرتەڭ جۇمىسقا بارۋ، كەشكە ۇيگە قايتۋ، جىلىنا ءبىر رەت دەمالىس الۋ سياقتى شەكارا ىشىندەگى ءومىر - مەنىكى ەمەس. ءقازىر وزىمە ۇنايتىن ىسپەن اينالىسىپ، شاعىن بولسىن اۋديتوريامدى قالىپتاستىرعانمىن. شىعارماشىلىق - مەنىڭ ءومىرىمنىڭ ءمانى. بولاشاقتا دا سونىمەن ءومىر سۇرگىم كەلەدى. ول مەنى تالاي بەلەستەرگە جەتەلەيتىنىنە سەنەمىن"، - دەدى ول.
سۋرەتتەر: كەيىپكەردىڭ جەكە مۇراعاتىنان الىندى
سونداي-اق، ول ءبىلىم جولىندا ءوز تۇسىنىگىن قالىپتاستىرعان جان رەتىندە قازىرگى جاستارعا اباي قۇنانباي ۇلىنىڭ فيلوسوفياسىن ەركىن تۇردە تۇسىنۋگە شاقىردى.
"ابايدىڭ ايتپاعىن كەز كەلگەن ادام كۇشپەن تىقپالاماسا عانا تۇسىنەدى. جاستارىمىزدىڭ ەموسيونال ينتەللەكتىسى جوعارى، تولەرانتتى. ولارعا ابايدىڭ فيلوسوفياسى جاقىن. ءبىراق بارىنە ادامنىڭ ءوزى سانالى تۇردە ءتۇسىنىپ بارىپ كەلۋى كەرەك"، - دەپ قوستى ول.