الماتىدا تۇرعىن ءۇي اۋماقتارىنداعى جارىقتاندىرۋدى جاقسارتۋ جانە ءقاۋىپسىز قالا كەڭىستىگىن قالىپتاستىرۋ جۇمىسى جالعاسۋدا. قالا اكىمى دارحان ساتىبالدى ناۋرىزباي اۋدانىنا بارىپ، ساۋلەتتىك-دەكوراتيۆتىك جارىقتاندىرۋ جانە كوركەيتۋدىڭ جاڭا نىساندارىن قارادى.
العاش بولىپ شۇعىلا شاعىناۋدانىنداعى «اربات – ۇلىقبەك» جاڭا جۇرگىنشىلەر ايماعى تانىستىرىلدى. جوبا كوركەيتۋگە ارنالعان بيۋدجەتتىك باعدارلامالار (حقب) اياسىندا جۇزەگە اسىرىلىپ، اۋدان تۇرعىندارى ءۇشىن قولايلى جانە ءقاۋىپسىز قوعامدىق كەڭىستىك قالىپتاستىرۋعا باعىتتالعان.
ايماقتىڭ جالپى ۇزىندىعى – 370 مەتر. مۇندا جۇرگىنشى جولدارى (2 مىڭ كۋب. م) جانە ۆەلوسيپەد جولاقتارى (1200 كۋب. م)، بالالار ويىن الاڭى، باسكەتبول الاڭى، ۆوركاۋت-ايماعى جانە شاعىن امفيتەاتر ورناتىلعان. سونداي-اق شاعىن ساۋلەتتىك فورمالار، كوشە جيھازى، اۆتوماتتى سۋارۋ جۇيەسى جانە جارىقتاندىرۋ ەلەمەنتتەرى قاراستىرىلعان. كوگالداندىرۋ اياسىندا 200 ءىرى اعاش جانە 4500 بۇتا وتىرعىزىلدى، 30 ورىندىق، 30 قوقىس جاشىگى جانە 28 شاعىن ساۋلەتتىك فورما ورناتىلدى.
الماتى اكىمى شاعىناۋداندارداعى جەرگىلىكتى قوعامدىق كەڭىستىكتەردى دامىتۋ ماڭىزدى ەكەنىن اتاپ ءوتتى.
«مۇنداي اۋماقتار تۇرعىندار ءۇشىن دەمالىس پەن سەرۋەننىڭ، كەزدەسۋ مەن قارىم-قاتىناستىڭ جايلى ءارى ءقاۋىپسىز ورتاسىن قالىپتاستىرادى. ءبىز قالانىڭ ءار اۋدانىن كەزەڭ-كەزەڭىمەن كوركەيتۋدى جالعاستىرامىز»، – دەدى دارحان ساتىبالدى.
كەلەسى نىسان – شۇعىلا تۇرعىن ءۇي كەشەنىندەگى ساۋلەتتىك-دەكوراتيۆتىك جارىقتاندىرۋ. جۇمىستار قالا بويىنشا قاسبەتتەردى جارىقتاندىرۋ باعدارلاماسى اياسىندا ىستەلگەن.
سونداي-اق جارىقتاندىرۋ الاتاۋ جانە سابدەنوۆ كوشەلەرى بويىنداعى توعىز تۇرعىن ۇيگە ورناتىلعان. قولدانىلعان زاماناۋي ەنەرگيا ۇنەمدەيتىن جابدىقتار قاسبەتتەر مەن اۋلا اۋماقتارىن بىركەلكى جارىقتاندىرۋدى قامتاماسىز ەتەدى. مۇنداي جوبالار تۇنگى ۋاقىتتا قاۋىپسىزدىكتى جانە جايلىلىقتى ارتتىرۋمەن قاتار، جاڭا تۇرعىن اۋدانداردىڭ ەستەتيكالىق كەلبەتىن قالىپتاستىرادى.
جۇمىس ساپارىنىڭ سوڭعى نۇكتەسى رايىمبەك داڭعىلى بويىنداعى «نۇرلى دالا» تۇرعىن ءۇي كەشەنى بولدى. مۇندا دا قاسبەتتىك جارىقتاندىرۋ تولىق اياقتالعان. جوبا سەگىز تۇرعىن ءۇيدى قامتيدى، سونداي-اق ءتيىمدى تەحنولوگيالار قولدانىلىپ، ەلەكتر قۋاتىن ۇنەمدەپ، جۇيەلەردىڭ ۇزاق مەرزىمدىلىگىن قامتاماسىز ەتەدى.
دارحان ساتىبالدى قالالىق كەڭىستىكتىڭ ەستەتيكاسى تۇرعىندار جايلىلىعىنىڭ ماڭىزدى قۇرامداس بولىگى ەكەنىن ايتتى.
«ءبىز ينجەنەرلىك ينفراقۇرىلىممەن قاتار، اۋدانداردىڭ سىرتقى كەلبەتىنە دە نازار اۋدارامىز. قاسبەتتىك جارىقتاندىرۋ قالانى زاماناۋي ەتەدى جانە كەشكى الماتىنى جانداندىرادى»، – دەپ اتاپ ءوتتى اكىم.
ارالاۋ بارىسىندا قالا اكىمى اۋدانداردى كەشەندى كوركەيتۋدى جالعاستىرۋدى، جوبالاردىڭ ساپاسى مەن مەرزىمىن قامتاماسىز ەتۋدى، سونداي-اق ساۋلەتتىك جارىقتاندىرۋ جۇيەلەرىنىڭ تەحنيكالىق جاعدايىنا باقىلاۋدى كۇشەيتۋدى تاپسىردى.