جەتىسۋ اۋدانىندا ونەركاسىپ ءوندىرىسى مەن ينۆەستيسيالار كولەمى ارتتى

جەتىسۋ اۋدانى قالانىڭ جەتەكشى ونەركاسىپتىك جانە ساۋدا ورتالىعىنىڭ ءبىرى رەتىندە ءوز پوزيسياسىن نىعايتتى. اۋدان اكىمى ءلاززات جىلقىبايەۆانىڭ ايتۋىنشا، ونەركاسىپ ءوندىرىسىنىڭ كولەمى 13،9%-عا ءوسىپ، 320،8 ملرد تەڭگەگە جەتكەن. ەكونوميكاعا سالعان ينۆەستيسيالار 93،8 ملرد تەڭگەنى قۇراپ، وندىرىستىك جانە الەۋمەتتىك ينفراقۇرىلىمدى دامىتۋعا ىقپال ەتتى.

ءقازىر اۋداندا 572 ونەركاسىپتىك كاسىپورىن جۇمىس ىستەيدى، ولاردىڭ 51ء-ى ۇلكەن جانە ورتا، 521ء-ى شاعىن كاسىپورىن. ولار جەتىسۋ اۋدانىنىڭ ونەركاسىپتىك الەۋەتىنىڭ نەگىزىن قۇراپ، جۇزدەگەن جاڭا جۇمىس ورنىن اشىپ وتىر.

قۇرىلىس سالاسىندا دا ءوسىم بايقالادى: بىتكەن جۇمىستىڭ كولەمى 44،5%-عا ارتىپ، 44،4 ملرد تەڭگەگە جەتتى. پايدالانۋعا بەرىلگەن تۇرعىن ءۇيدىڭ اۋماعى 15%-عا كوبەيىپ، تۇرعىن ءۇي قۇرىلىسىنىڭ قارقىنى جوعارى بولىپ وتىر.

بيزنەسكە قولداۋ كورسەتۋ مەن ينۆەستيسيالاردى ىنتالاندىرۋ الماتى قالاسىنىڭ بيۋدجەتىنە تۇسەتىن سالىق ءتۇسىمىن 10،5%-عا ارتتىرىپ، 258،8 ملرد تەڭگەگە جەتكىزدى. اۋداندا 3 288 جاڭا جۇمىس ورنى قۇرىلدى.

اكىمنىڭ ايتۋىنشا، جۇزەگە اسىپ جاتقان شارۋالار ەكونوميكانى دامىتۋعا عانا ەمەس، تۇرعىنداردىڭ ءومىر ءسۇرۋ ساپاسىن ارتتىرۋعا دا باعىتتالعان.