قازاقستان تەمىر جولى كەيىنگى 10 ايدا 30 ادامنىڭ قاتىسۋىمەن اپات بولعانىن مالىمدەدى، - دەپ حابارلايدى Aqshamnews.kz ءتىلشىسى.
"قازاقستان تەمىر جولى" ۇلتتىق كومپانياسى تەمىرجول نىساندارىندا تىركەلگەن جازاتايىم وقيعالار بويىنشا دابىلدى ستاتيستيكا جاريالادى. 2025 جىلدىڭ العاشقى 10 ايىندا ەل بويىنشا پويىزدىڭ ادامداردى قاعۋ دەرەگى 30 رەت تىركەلگەن. وقيعالار سالدارىنان 34 ادام زارداپ شەگىپ، ونىڭ 15ء-ى قازا تاپقان، 19-ى ءتۇرلى جاراقات العان. جابىرلەنۋشىلەردىڭ قاتارىندا ءۇش كامەلەتكە تولماعان ءجاسوسپىرىم بار.
كومپانيا مالىمەتىنشە، وقيعالاردىڭ باسىم بولىگى ازاماتتاردىڭ تەمىرجولدا ءجۇرۋ ەرەجەلەرىن ورەسكەل بۇزۋىنان بولعان. زارداپ شەككەندەردىڭ 40%-ى (12 ادام) وقيعا كەزىندە ماس كۇيدە بولعان. باسقا جاعدايلاردا ادامدار قۇلاققاپ كيىپ جۇرگەن. ءبىر سۋيسيد فاكتىسى دە تىركەلگەن.
سونىمەن قاتار كەيىنگى 10 ايدا تەمىرجولدا 24 جول-كولىك وقيعاسى بولعان، ونىڭ ۇشەۋىنە جولاۋشىلار پويىزدارى قاتىسقان.
قتج، اسكەري كۇزەت جانە جەلىلىك پوليسيا بىرلەسىپ 1 570 رەيد جۇرگىزىپ، 2 105 تۇرعىن جينالىسىن ۇيىمداستىرعان. ناتيجەسىندە ەرەجەنى بۇزعاندارعا 39 اكىمشىلىك ايىپپۇل سالىنعان.
كومپانيا تەمىرجولداعى قاۋىپسىزدىك ەڭ الدىمەن ازاماتتاردىڭ جاۋاپكەرشىلىگىنە بايلانىستى ەكەنىن اتاپ ءوتىپ، جولدى تەك بەلگىلەنگەن جەردەن كەسىپ وتۋگە جانە تەمىرجول ماڭىندا اسا ساق بولۋعا شاقىردى.