توقايەۆ كەدەندەگى بىلىقتاردى شەشۋ ءۇشىن ۇكىمەتكە 10 كۇن بەردى
ق ر پرەزيدەنتى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا لوگيستيكا سالاسىنا حالىقارالىق كومپانيالاردى تارتۋ قاجەتتىگىن ايتتى ، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«كەدەن بەكەتتەرىندەگى قوردالانعان ماسەلەلەردى جەدەل شەشۋ قاجەت. بۇل - بيۋدجەت ءۇشىن ايرىقشا ماڭىزى بار سالا. تاعى دا قايتالاپ ايتام، ونداعى بىلىقتى جونگە كەلتىرمەسە، سالدارى قيىن بولۋى مۇمكىن. قىتايدىڭ ستاتيستيكاسى مەن بىزدەگى كورسەتكىشتىڭ ايىرماسى 5،7 ملرد دوللار بولۋى - سونىڭ دالەلى. ءقازىر قىتايمەن اراداعى كەدەن بەكەتىندە 12 مىڭنان استام كولىك ەلەكتروندى كەزەكتە تۇر. قۇزىرلى ەكونوميكالىق وپەراتورلاردىڭ زاڭسىز ىس-ارەكەتى تۋرالى بۇعان دەيىن دە ايتتىم. ولار كەدەننەن جانە باسقا دا باقىلاۋ ورگاندارىنان سونشاما جەڭىلدىكتى قالاي الىپ وتىر؟ نە سەبەپتى بۇل ماسەلە نازاردان تىس قالعان؟ بۇل سۇراقتارعا 10 كۇننىڭ ىشىندە ناقتى ءارى تولىق جاۋاپ كۇتەمىن»، - دەگەن مەملەكەت باسشىسى سالانىڭ قىزمەتىن زاڭ بويىنشا قاتاڭ رەتتەۋدى تاپسىردى.
سونداي-اق ول كەدەن مەن لوگيستيكا سالاسىنداعى پروبلەمالاردى حالىقارالىق ويىنشىلاردى تارتۋ ارقىلى شەشۋگە بولاتىنىن اتادى.
«جالپى، كەدەن جانە لوگيستيكا جۇيەسىنە ءىرى حالىقارالىق كومپانيالاردى تارتۋدى ويلاستىرعان ءجون. ولار قاجەتتى تاسىمال كولەمىن جانە جۇمىستىڭ اشقىق ءارى ەسەپتى بولۋىن قامتاماسىز ەتە الادى. بۇل ماسەلە ۇكىمەتتە تالقىلاندى. ۇكىمەتكە ونى تاعى دا پىسىقتاپ، ماعان بايانداۋدى تاپسىرامىن»، - دەدى پرەزيدەنت.