بۇل - ورتالىق ازياداعى وزگە ەلدەرمەن سالىستىرعاندا كوپ كورسەتكىش.
قازاق كينوسى فرانسيادا قاراپايىم كورەرمەننىڭ دە، سالا ماماندارىنىڭ دا جۇرەگىن جاۋلاپ العان. ولار جاڭا فيلمدەرىمىزدى ۇنەمى اسىعا كۇتەتىندەرىن ايتادى. بيىل ولاردىڭ نازارىنا "موڭعول" تاريحي بلوكباستەرى، رەجيسسەر ءامىر بايعازينننىڭ «جارالى پەرىشتە» مەن رەجيسسەر دارەجان ومىربايەۆتىڭ «ستۋدەنت» فيلمدەرى جانە جاپونيامەن بىرلەسىپ تۇسىرىلگەن «بارىمتاشىلار» كارتيناسى ۇسىنىلادى، دەپ حابارلايدى Almaty-akshamy.kz 24.kz-كە سىلتەمە جاساپ.
«كورسەتىلگەن فيلمدەر كورەرمەندەردىڭ ەلىمىزگە قىزىعۋشىلىعىن ارتتىردى. ۇلى دالا مەن تاۋلاردى كورۋ ءۇشىن پاندەميادان كەيىن قازاقستانعا قالاي بارۋعا بولاتىنى جايلى ۇنەمى سۇرايدى. ادامدارىڭىز قانداي سۇلۋ دەيدى. ياعني كينەماتوگرافيانىڭ ارقاسىندا قازاقستانعا ساياحاتتاۋعا ىنتاسىن وياتتىق»، - فرانسياداعى قازاقستان كينو قاۋىمداستىعىنىڭ پرەزيدەنتى اندرە يۆانوۆ
ورتالىق ازيا كينوسىنىڭ رەتروسپەكتيۆاسىن يۋنەسكو ۇيىمى دا قولدادى. فەستيۆال ۇيىمداستىرۋشىلار «تاشكەنت - گورود حلەبنىي» ءفيلمىن كورسەتۋ مۇمكىندىگىن ۇلكەن جەتىستىك دەپ سانايدى. ويتكەنى ولارعا بۇل كارتينانىڭ ءتۇپنۇسقاسىن ايرىقشا سەنىپ تاپسىرعان ەكەن.
«28 جىل بويى حالىقتى ورتالىق ازيا كينوسىمەن تانىستىرىپ كەلەمىز. بۇل وتە سيرەك فيلمدەر بولعاندىقتان، كورەرمەندەرگە مۇمكىندىكتى جىبەرىپ الماۋعا كەڭەس بەرەمىن. فەستيۆال قوناقتارى بىرەگەي رەتروسپەكتيۆانى ۇيىمداستىرۋ بويىنشا ەڭبەگىمىزدى جوعارى باعالادى»، - دەدى ۆەزۋلدەگى ازيا كينوسى فەستيۆالىنىڭ ۇيىمداستىرۋشىسى جان-مارك تەرۋانن.
ۇيىمداستىرۋشىلاردىڭ ايتۋىنشا، ورتالىق ازيا كينوسى – فەستيۆال تاريحىنداعى ەڭ ۇلكەن جاڭالىق. پاندەميا كەسىرىنەن بۇكىل الەمدە كينووندىرىس توقىراپ تۇرعان تۇستا، رەتروسپەكتيۆالىق كورسەتىلىمدەر ىندەتكە دەيىن تۇسىرىلگەن ۇزدىك تۋىندىلاردى تاماشالاۋعا مۇمكىندىك بەرەدى.