مەملەكەت باسشىسى قاسىم-جومارت توقايەۆ «انا ءتىلى» گازەتىنە بەرگەن سۇحباتىندا اقتاۋ قالاسى ماڭىندا ازەربايجان اۋە كومپانياسىنىڭ ۇشاعى اپاتقا ۇشىراعانىن، قارا جاشىكتى برازيليا ەلىنە جىبەرۋ تۋرالى شەشىم قانشالىقتى ماڭىزدى ەكەنىن اتاپ ءوتتى، دەپ حابارلايدى aqshamnews.kz
— جەلتوقساننىڭ سوڭعى كۇندەرى اقتاۋ قالاسىندا ازەربايجان اۋە كومپانياسىنىڭ ۇشاعى اپاتقا ۇشىرادى. 38 ادام قازا بولدى، ونىڭ ىشىندە ەلىمىزدىڭ 6 ازاماتى بار. اۋىر جاراقات العاندار دا كوپ. مۇنداي ساتتە ءاربىر سەكۋند قىمبات. قۇتقارۋشىلار، دارىگەرلەر مەن ءتارتىپ ساقشىلارى شۇعىل ءارى ۇيلەسىمدى ارەكەت ەتتى، كاسىبي دەڭگەيى مەن ازاماتتىق جاۋاپكەرشىلىگى جوعارى ەكەنىن كورسەتتى. جاقىن جەردەگى ماڭعىستاۋ وڭىرلىك ەلەكتر تورابى كومپانياسىنىڭ جۇمىسشىلارى بىردەن كومەككە كەلدى. توڭىرەكتەگى تۇرعىندار دا زارداپ شەككەندەردى قۇتقارۋعا اتسالىستى. ازاماتتارىمىزدىڭ جانقيارلىعى ارقاسىندا بارىنشا كوبىرەك ادامنىڭ ءومىرىن ساقتاپ قالدىق. مەن قۇتقارۋ جۇمىستارىنا قاتىسقان ءاربىر ادامعا شىن كوڭىلدەن ريزاشىلىعىمدى بىلدىرەمىن. قازاق حالقىنىڭ اپاتتان زارداپ شەككەندەرگە جاناشىرلىعى مەن تىلەۋلەستىگى ازاماتتارىمىزدىڭ جاپپاي قان تاپسىرۋعا اسىققانىنان دا ايقىن بايقالدى، — دەدى مەملەكەت باسشىسى.
پرەزيدەنت سونداي-اق ۇشاق اپاتىنىڭ سەبەبىن انىقتاۋ ءۇشىن ۇكىمەت كوميسسياسى قۇرىلعانىن اتاپ ءوتتى.
— سونىمەن بىرگە 17 حالىقارالىق ساراپشى شاقىرىلدى. ونىڭ ىشىندە حالىقارالىق ازاماتتىق اۆياسيا ۇيىمىنىڭ جانە مەملەكەتارالىق اۆياسيا كوميتەتىنىڭ ماماندارى بار. ۇكىمەت كوميسسياسى مالىمەتتىڭ ءبارى جازىلعان ارنايى قۇرىلعىنى سول ۇشاقتى جاساعان برازيليا ەلىنە جىبەرۋ تۋرالى شەشىم قابىلدادى. بۇل قادام تەرگەۋ جۇمىستارىنىڭ وبەكتيۆتى ءارى بەيتاراپ جۇرگىزىلۋىنە قاجەتتى بىردەن-بىر دۇرىس شەشىم ەكەنىنە سەنىمدىمىن، - دەدى پرەزيدەنت.