مەملەكەت باسشىسى بۇگىنگى قوعامدا تالقىعا تۇسكەن وزەكتى ماسەلەلەردىڭ ءبىرى ءبىرىڭعاي ۋاقىت بەلدەۋىنە قاتىستى «انا ءتىلى» گازەتىنە بەرگەن سۇحباتىندا ءوز ويىمەن ءبولىستى، دەپ حابارلايدى aqshamnews.kz
– قوعامدا ءبىرىڭعاي ۋاقىت بەلدەۋى تۋرالى ءتۇرلى پىكىر بار. پارلامەنت پەن ۇكىمەتتىڭ اراسىندا وسىعان قاتىستى پىكىرتالاس ءجۇرىپ جاتقانىن دا بىلەمىز. بۇل جونىندە نە ايتار ەدىڭىز؟
– ارينە، مەن جاعدايدى كورىپ-بىلىپ وتىرمىن. ۇكىمەت ءوز شەشىمىنىڭ ورىندى ەكەنىنە سەنىمدى جانە قازاقستان ءبىر ۋاقىت بەلدەۋىندە بولۋى قاجەت دەپ سانايدى. ۋاقىتتى دۇرىس پايدالانۋ تۋرالى بارسەلونا دەكلاراسياسىندا ءارتۇرلى ۋاقىت بەلدەۋىن ەنگىزۋگە، ونى قىسقى جانە جازعى ۋاقىتقا اۋىستىرۋعا اۋەس بولماۋ قاجەتتىگى ايتىلعان. دەگەنمەن ازاماتتارىمىز ءوتىنىش ءبىلدىرىپ جاتىر. ۇكىمەتتىڭ شەشىمىنە قاتىستى اشىق تالقىلاۋلار جاندانا ءتۇستى. مەنىڭشە، قوعامدا كوزقاراس قايشىلىعىن تۋدىراتىن مۇنداي ماسەلەلەردى مۇقيات تالقىلاۋ قاجەت. سوندىقتان پارلامەنتتە عالىمداردىڭ، ساراپشىلاردىڭ جانە ايماق وكىلدەرىنىڭ قاتىسۋىمەن قوعامدىق تىڭداۋ ءوتتى. تاراپتار ۋاقىت بەلدەۋىن اۋىستىرۋدىڭ ەل ەكونوميكاسىنا جانە ازاماتتاردىڭ تۇرمىسىنا اسەرى جونىندەگى بارلىق پىكىردى ەسكەرە وتىرىپ، 1 ناۋرىزعا دەيىن جان-جاقتى زەرتتەۋ جۇرگىزۋگە ۋاعدالاستى. سودان كەيىن ناقتى ۇسىنىستار ازىرلەنەدى. پارلامەنت پەن ۇكىمەت بۇل ماسەلەنى بايىپپەن زەردەلەپ، ورتاق ءارى دۇرىس شەشىمگە كەلەتىنىنە سەنىمدىمىن.