ءابىلحان قاستەيەۆ اتىنداعى ق ر مەملەكەتتىك ونەر مۋزەيى قازاقستان حالقى اسسامبلەياسىنىڭ 30 جىلدىعىنا وراي ءوز قورىنان «XX-XXI عاسىرلار ونەرى» ەكسپوزيسياسىن ۇسىنىپ وتىر.
كورمەدە ت.يالونسكايا (ۋكراينا)، ي.كلىچيەۆ (تۇرىكمەنستان)، ن.نيكوگوسيان (ارمەنيا)، يۋ.گۋسەينوۆ (ءازىربايجان)، ۆ.كالنروزە (لاتۆيا)، ۆ.بۋرماكين (وزبەكستان) سىندى وزگە دە تانىمال سۋرەتشىلەردىڭ كارتينالارى بار.
ونەر ءتىلى ايقىن جانە مانەرلى، بارىنە تۇسىنىكتى جانە اۋدارمانى قاجەت ەتپەيدى. سوندىقتان بۇل ءوزارا تۇسىنىستىككە، بىرلىككە جول اشاتىن، ءبىر-بىرىن جاقسى بىلۋگە، باسقا ادامداردىڭ، حالىقتار مەن مادەنيەتتەردىڭ كوزقاراسىن، جان دۇنيەسىن تۇسىنۋگە كومەكتەسەتىن قولجەتىمدى قۇرال دەسەك تە قاتەلەسپەيمىز.
ءيا، ونەر بارىمىزگە ورتاق جانە ول بىزگە ءتىلسىز-اق ماڭىزدى دۇنيەلەر تۋرالى ايتادى: ماحاببات پەن سۇلۋلىق، باقىت پەن قايعى، پارىز بەن ار-نامىس، ادالدىق پەن دوستىق. ۇلتتىق مەكتەپتەر داستۇرىندە جۇمىس ىستەيتىن اۆتورلار كەيىپكەرلەرىنىڭ الەمىن ۇلتتىق باستامالار ارقىلى اشۋدى كوزدەيدى.
– سۋرەتشىلەر وزدەرىنە جاقىن تاجىريبەنى شارتتى ەستەتيكالىق كەڭىستىككە، ينتەللەكتۋالدى-پوەتيكالىق كوزقاراس ارقىلى جەتكىزەدى. ءار شەبەردىڭ وزىندىك ءستيلى مەن شىعارماشىلىق ءتاسىلى، كەسكىندەمە تەحنيكاسى مەن جانرلىق قالاۋى بار. ەكسپوزيسيادا، ماسەلەن، ارمەنيادان كەلگەن بۇلىكشى اقىننىڭ ەكسپرەسسيۆتى ەموسيونالدى پورترەتى، جەمىستەرى بار ءداستۇرلى شىعىس تاعامدارى، كۇندە قولدانىستاعى تۇرمىستىق زاتتار، تاڭەرتەڭگى كۇن ساۋلەسىندەگى شىرىندى-جاسىل باقتار، لاتۆيا اۋىلى، سۋاتتاعى بەينە، كىلەم توقىپ وتىرعان حالىق قولونەرشىلەرى، تاڭسارىدە بالىق اۋلاۋعا شىققان بالىقشىلار بەينەنلەگەن شىعارمالار بىر-بىرىمەن ءوزارا ۇيلەسىم تاپقان. ونەر دە حالىقتى بىر-بىرىمەن ءجاقىنداستىرادى، – دەيدى ءا.قاستەيەۆ اتىنداعى ق ر مەملەكەتتىك ونەر مۋزەيىنىڭ «شەتەل ونەرى» ءبولىمىنىڭ جەتەكشىسى ۆيولەتتا ۆولوگودسكايا.
