وتكەن جىلى بالاسىنا اليمەنت تولەمەگەنى ءۇشىن 4،5 مىڭنان استام بورىشكەر اكىمشىلىك جاۋاپكەرشىلىككە تارتىلدى. بۇل تۋرالى ورتالىق كوممۋنيكاسيالار قىزمەتىندەگى بريفينگتە ادىلەت مينيسترلىگىنىڭ رەسمي وكىلى تالعات ءۋالي ايتتى، دەپ حابارلايدى aqshamnews.kz
- اليمەنت ءوندىرۋ بويىنشا اتقارۋشىلىق ءىس جۇرگىزۋ – ادىلەت مينيسترلىگى تۇراقتى باقىلاۋدا ۇستاپ وتىرعان الەۋمەتتىك ماڭىزى بار ماسەلەلەردىڭ ءبىرى. ءقازىر وندىرىستە 283 مىڭ اتقارۋشىلىق ءىس بار. ونىڭ ىشىندە بورىشكەر ەر ادامدار سانى 272 مىڭ بولسا، ايەلدەر سانى 11 مىڭنان اسادى. ونداعى 16 352 ءىس بويىنشا بەرەشەك 16 ملرد تەڭگە، - دەدى ول.
رەسمي وكىلدىڭ ايتۋىنشا، كوپ جاعدايدا بورىشكەرلەردىڭ اليمەنتى اي سايىن جۇمىس بەرۋشىلەردىڭ بۋحگالتەرياسى ارقىلى وندىرىلەدى. سوندىقتان بورىشكەرلەردى جۇمىسقا ورنالاستىرۋ بەلسەندى تۇردە جۇرگىزىلىپ جاتىر.
- 2023 جىلى 4 238 ادام جۇمىسقا ورنالاستىرىلسا، بۇل كورسەتكىش 2024 جىلى 6 مىڭنان استام ادام بولدى. ءوز مىندەتتەرىن ورىنداماعانى ءۇشىن بورىشكەرلەر اكىمشىلىك جانە قىلمىستىق جاۋاپكەرشىلىككە تارتىلادى. ماسەلەن، 2024 جىلى 4،5 مىڭنان استام بورىشكەر اكىمشىلىك جاۋاپكەرشىلىككە تارتىلدى. ال قك 139-بابى (اليمەنت تولەۋ مىندەتتەرىن ورىنداماۋ) بويىنشا 391 ادام سوتتالدى. سونداي-اق بورىشكەرلەردىڭ بانك شوتتارىنا تىيىم سالۋ جانە ۋاقىتشا شەكتەۋلەر سياقتى شارالار قولدانىلادى، - دەدى تالعات ءۋالي.
وسى رەتتە ول بيىلعى ءىرى كولەمدەگى ءوندىرىپ الۋلار بويىنشا بىرەر مىسال كەلتىردى. ماسەلەن، استانادا اليمەنت تولەمەي جۇرگەن ازاماتتىڭ Mercedes-Benz S400 ماركالى كولىگى 23 ملن تەڭگەگە ساتىلدى. جامبىل وبلىسىندا بورىشكەر قارىزدى وتەۋ ءۇشىن 11 ملن تەڭگەدەن استام تۇراتىن جىلجىمايتىن مۇلكىن قارىزىن وتەۋ ءۇشىن بەردى. بورىشكەرگە قىلمىستىق ءىس قوزعالدى. ال الماتىدا 9 ملن تەڭگەدەن استام قارىزدى وتەۋ ءۇشىن 2017 جىلعى Hyundai Tucson اۆتوكولىگى ءوندىرىپ الۋشىعا تاپسىرىلدى.