ق ر پرەمەر-مينيسترىنىڭ ورىنباسارى – قارجى ءمينيسترى ەرۇلان جاماۋبايەۆ «قارىزسىز قوعام» جوباسىن جۇزەگە اسىرۋ ماسەلەسى بويىنشا كەڭەس وتكىزدى.
وڭىرلىك جوبالىق كەڭسەلەر ەلىمىزدىڭ بارلىق وبلىس ورتالىقتارىندا جانە رەسپۋبليكالىق ماڭىزى بار قالالاردا اشىلادى. ورتالىق جوبالىق كەڭسەسى استانا قالاسىندا ورنالاسادى. اتالعان الاڭداردا كونسۋلتاتيۆتىك-كەڭەسشى توپتار قۇرىلادى، ولاردىڭ قۇرامىنا قارجى بويىنشا تاۋەلسىز كەڭەسشىلەر، قارجى نارىعىن رەتتەۋ جانە دامىتۋ اگەنتتىگىنىڭ وكىلدەرى جانە جەكە سوت ورىنداۋشىلارى كىرەدى، دەپ حابارلايدى Almaty-akshamy.kz.
Primeminister.kzء-تىڭ حابارلاۋىنشا،ولار ازاماتتارعا بانكتەر مەن شاعىن قارجى ۇيىمدارى الدىنداعى مەرزىمى وتكەن بەرەشەكتەردى رەتتەۋ بويىنشا كەڭەس بەرەدى، ءارى قاراي بيزنەستى جوسپارلاۋعا جانە جۇمىسقا ورنالاسۋعا كومەكتەسەدى. مەكتەپتەردىڭ، كوللەدجدەردىڭ جانە جوعارى وقۋ ورىندارىنىڭ وقىتۋشىلارىنا قارجىلىق جانە قۇقىقتىق ساۋاتتىلىقتى ۇيرەتەتىن وقۋ-ادىستەمەلىك ماتەريالداردى ازىرلەۋ جانە مامانداردى دايارلاۋ جوسپارلانىپ وتىر.
حالىقتىڭ ودان ءارى قارىز الۋىنا جول بەرمەۋ، بورىشتىق جۇكتەمەنىڭ ءوسۋىن شەكتەۋ، قارجى نارىعىنداعى الاياقتىق فاكتىلەرىن ازايتۋ، اتقارۋشىلىق ءىس جۇرگىزۋدى جەتىلدىرۋ جانە تۇتىنۋشىلاردىڭ قۇقىقتارىن قورعاۋدى كۇشەيتۋ ءۇشىن زاڭنامانى ودان ءارى جەتىلدىرۋ ارقىلى جۇيەلى شارالار قابىلداناتىن بولادى.
ەسكە سالا كەتەيىك، مەملەكەت باسشىسى بيىلعى 1 قىركۇيەكتەگى قازاقستان حالقىنا جولداۋىندا «قارىزسىز قوعام» جوباسىنىڭ ماڭىزدىلىعىن جانە ونى ەلىمىزدىڭ بارلىق ايماعىندا كەڭەيتۋ قاجەتتىگىن اتاپ وتكەن بولاتىن. «قارىزسىز قوعام» جوباسىنىڭ ماقساتى – ازاماتتارعا قارجىلىق جانە قۇقىقتىق بىلىكتى كومەك كورسەتۋ، حالىقتىڭ قارجىلىق ساۋاتتىلىعىن ارتتىرۋ، ازاماتتاردىڭ بانكتىك نەسيەلەر مەن شاعىن نەسيەلەر بويىنشا پروبلەمالىق قارىزدارىن شەشۋگە كومەكتەسۋ.
«قازاقستان رەسپۋبليكاسى ازاماتتارىنىڭ تولەم قابىلەتتىلىگىن جانە بانكروتتىقتى قالپىنا كەلتىرۋ تۋرالى» زاڭى اياسىندا وسى جىلدىڭ 3 ناۋرىزى مەن 11 قازانى ارالىعىندا قازاقستاندىقتاردان سوتتان تىس بانكروتتىققا 68،3 مىڭ ءوتىنىش تۇسكەن. ولاردىڭ 55،2 مىڭى بويىنشا ازاماتتار 1414 نومىرىنە SMS حابارلاما جىبەرۋ ارقىلى وسى ءتارتىپتى قولدانۋدان باس تارتۋ تۋرالى حابارلاما الدى.
5،7 مىڭ ازاماتقا قاتىستى سوتتان تىس بانكروتتىق ءراسىمى جۇرگىزىلىپ جاتىر، 1،2 مىڭ ءوتىنىش قارالۋدا. 5،2 مىڭ ازامات بانكروت دەپ تانىلىپ، ولاردىڭ جالپى بەرەشەگى 8 ملرد تەڭگەدەن استى.