«جاۋىنگەرلىك دايىندىق مامانى كۇنىنە» ورايلاستىرىلعان سالتاناتتى ءىس-شاراعا قورعانىس ءمينيسترىنىڭ ءبىرىنشى ورىنباسارى – قازاقستان رەسپۋبليكاسى قارۋلى كۇشتەرى باس شتابىنىڭ باستىعى گەنەرال-لەيتەنانت سۇلتان قامالەتدينوۆ قاتىستى.
قورعانىس ءمينيسترىنىڭ ءبىرىنشى ورىنباسارى جاۋىنگەرلىك دايىندىق اسكەري قىزمەتشىلەردى وقىتۋدىڭ اجىراماس بولىگى ەكەنىن اتاپ ءوتتى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
جاۋىنگەرلىك دايارلىق ماماندارىنىڭ كۇندەلىكتى قاجىرلى ەڭبەگى قازاقستان اسكەرىنىڭ قورعانىس قابىلەتىنىڭ نەگىزىن قۇرايدى.
– سىزدەردىڭ ەڭبەكتەرىڭىزدىڭ ارقاسىندا ءبىزدىڭ بولىمشەلەر ءارقاشان جاۋىنگەرلىك دايىندىقتا بولادى، – دەدى گەنەرال-لەيتەنانت سۇلتان قامالەتدينوۆ. – وفيسەرلەر مەن ساربازداردىڭ ءبىلىمى مەن داعدىلارىن جەتىلدىرۋگە كومەكتەسىپ كەلەسىزدەر.
قازاقستان رەسپۋبليكاسى قورعانىس ءمينيسترى گەنەرال-پولكوۆنيك رۋسلان جاقسىلىقوۆتىڭ بۇيرىعىمەن 6 اسكەري قىزمەتشى «ەل قورعانى» مەدالىمەن، 5 اسكەري قىزمەتشى «قازاقستان رەسپۋبليكاسى قارۋلى كۇشتەرىنىڭ ۇزدىگى» توسبەلگىسىمەن ماراپاتتالدى. باعالى سىيلىقپەن (قول ساعاتتارىمەن) 30 اسكەري قىزمەتشى، گراموتالارمەن 27 اسكەري قىزمەتشى ماراپاتتالىپ، 15 اسكەري قىزمەتشىگە العىس جاريالاندى.
قورعانىس ءمينيسترىنىڭ ءبىرىنشى ورىنباسارى – قازاقستان رەسپۋبليكاسى قارۋلى كۇشتەرى باس شتابى باستىعىنىڭ بۇيرىعىمەن 29 اسكەري قىزمەتشى گراموتالارمەن ماراپاتتالدى، 15 اسكەري قىزمەتشىگە العىس جاريالاندى.