قازاقستاندا 1 قازان – قارتتار كۇنىنە وراي وڭىرلەردە زەينەتكەرلەرگە ءارتۇرلى كولەمدە الەۋمەتتىك كومەك كورسەتىلەدى، - دەپ حابارلايدى Aqshamnews.kz.
استانا
ەلوردادا 100 مىڭنان استام زەينەتكەرگە 2،5 اەك كولەمىندە (شامامەن 9 830 تەڭگە) ءبىرجولعى تولەم بەرىلەدى. بۇل باستاما بىلتىرعى ءداستۇر بويىنشا جالعاسىپ وتىر.
الماتى
الماتىدا قارجىلاي كومەك قاراستىرىلماعان. قالا بيلىگىنىڭ مالىمەتىنشە، زەينەتكەرلەرگە قولداۋ 13 ءتۇرلى الەۋمەتتىك قىزمەت ارقىلى جۇزەگە اسادى.
شىمكەنت
مەگاپوليستە 70 جاستان اسقان قاريالارعا 3 اەك (11 796 تەڭگە) كولەمىندە ءبىرجولعى كومەك بەرىلەدى. ال 80 جاستان اسقان جالعىزىلىكتى قارتتارعا اي سايىن 2 اەك (7 864 تەڭگە) الەۋمەتتىك تولەم قاراستىرىلعان.
اتىراۋ وبلىسى
بۇل وڭىردە مۇگەدەكتىگى بار زەينەتكەرلەرگە قازان ايىندا 7،5 اەك (29 490 تەڭگە) كولەمىندە ءبىرجولعى كومەك تولەنەدى. سونىمەن بىرگە «تەڭىزشيەۆرويلدىڭ» قولداۋىمەن 2023-2025 جىلدار ارالىعىندا 300-گە جۋىق قاريا اتىراۋ شيپاجايىندا ەم قابىلدايدى.
اقتوبە وبلىسى
مۇندا ءبىرجولعى وتەماقى بەرىلمەيدى. اكىمدىكتىڭ مالىمەتىنشە، قارتتارعا تولەم كونستيتۋسيا كۇنى جاسالعاندىقتان، قارتتار كۇنىنە ارنايى قارجى قاراستىرىلماعان. دەگەنمەن مەرەكەلىك ءىس-شارالار وتەدى.
قاراعاندى وبلىسى
وڭىردە 70 جاستان اسقان 51 مىڭنان استام زەينەتكەرگە ءبىرجولعى تولەم بەرىلەدى. اكىمدىكتىڭ حابارلاۋىنشا، جەرگىلىكتى بيۋدجەتتەن 1 ملرد تەڭگەدەن استام قارجى بولىنگەن. سوما قالا-اۋداندارعا قاراي 10 مىڭنان 20 مىڭ تەڭگەگە دەيىن وزگەرىپ وتىرادى.
ماڭعىستاۋ وبلىسى
وڭىردە 70 جاستان اسقان 24 مىڭنان استام قارياعا اۋداندىق جانە قالالىق ءماسليحاتتاردىڭ شەشىمىمەن 15 مىڭ تەڭگە كولەمىندە ءبىرجولعى كومەك تولەنەدى.