ق ر قارجى مينيسترلىگى جالاقى مەن شىعىستاردى سيفرلىق باقىلاۋدى كەڭەيتۋ ارقىلى مەملەكەتتىك ءاۋديتتىڭ جاڭا دەڭگەيىنە شىعۋدا.
قازاقستان رەسپۋبليكاسى قارجى مينيسترلىگى بيۋدجەت شىعىستارىن مەملەكەتتىك اۋديتتەۋدى سيفرلاندىرۋدى بەلسەندى تۇردە ىلگەرىلەتىپ كەلەدى. بۇل باعىتتا «ونلاين بيۋدجەت مونيتورينگى» ءمودۋلىن قولدانۋ اياسىن كەڭەيتۋ جۇمىستارى جۇرگىزىلۋدە، دەپ حابارلايدى aqshamnews.kz.
اتالعان جۇيە ناقتى ۋاقىت رەجيمىندە قارجى قاراجاتىنىڭ ماقساتتى پايدالانىلۋىن باقىلاۋعا مۇمكىندىك بەرەدى، باقىلاۋ پروسەستەرىن اۆتوماتتاندىرادى جانە زاڭبۇزۋشىلىقتاردى جەدەل انىقتاۋعا جول اشادى. ناتيجەسىندە قارجىلىق وپەراسيالاردىڭ اشىقتىعى ارتىپ، بيۋدجەت قاراجاتىن باسقارۋدىڭ تيىمدىلىگى جاقسارادى.
وبم جۇيەسى الەۋمەتتىك سالا ۇيىمدارىنداعى جالاقى تولەمدەرىن قاشىقتان باقىلاۋعا مۇمكىندىك بەرەدى. بۇگىندە مونيتورينگ تەك ءبىلىم بەرۋ سالاسىن عانا ەمەس، دەنساۋلىق ساقتاۋ، مادەنيەت، تۋريزم جانە سپورت سالالارىن دا قامتيدى. كۇن سايىن 6 مىڭعا جۋىق مەملەكەتتىك مەكەمەنىڭ 140 ميلليون تەڭگەدەن استام ترانزاكسياسى تالدانادى.
اعىمداعى جىلدىڭ باسىنان باستاپ جەدەل ارەكەت ەتۋ ارقىلى 664 ميلليون تەڭگەدەن استام قاراجاتتى تالان-تاراجعا سالۋدىڭ الدىن الۋعا مۇمكىندىك تۋدى.
سونىمەن قاتار، بۇزۋشىلىقتاردىڭ الدىن الۋ شارالارى ۇنەمى ءتيىمدى ناتيجە بەرە بەرمەيدى. مۇنداي جاعدايدا جاۋاپتى تۇلعالارعا قاتىستى ءتيىستى ارەكەت ەتۋ شارالارى قابىلدانادى. ماسەلەن، باتىس قازاقستان وبلىسى اۋداندارىنىڭ بىرىندەگى كىتاپحانا جۇيەسىندە جۇرگىزىلگەن كوشپەلى اۋديت بارىسىندا بۋحگالتەردىڭ جەكە شوتىنا زاڭسىز اۋدارىلعان 45 ميلليون تەڭگەدەن استام قاراجات انىقتالدى. الماتى قالاسىندا ق ر قارجى مينيسترلىگى ىشكى مەملەكەتتىك اۋديت كوميتەتىنىڭ اۋماقتىق دەپارتامەنتى تاراپىنان بىرنەشە ەسكەرتۋ جاسالعان سوڭ، قالالىق ءبىلىم باسقارماسى ارنايى گيمنازيا ديرەكتورى مەن ءبىر مەكتەپتىڭ ءبىر توپ بۋحگالتەرىن جۇمىستان بوساتۋ تۋرالى شەشىم قابىلدادى.
وبم جۇيەسىنىڭ دامۋى بارىسىندا مونيتورينگ نىساندارىنا تاۋەكەلدەر تۋرالى اۆتوماتتى تۇردە حابارلامالار گەنەراسيالاپ، جولداۋ فۋنكسياسى ەنگىزىلدى. بۇل رەتتە ق ر سىبايلاس جەمقورلىققا قارسى ءىس-قيمىل اگەنتتىگى مەن ونىڭ اۋماقتىق دەپارتامەنتتەرى دە ءبىر ۋاقىتتا حاباردار ەتىلەدى. بۇل قابىلداناتىن شارالاردىڭ الدىن الۋعا باعىتتالعانىن تاعى ءبىر مارتە دالەلدەيدى.
«ونلاين بيۋدجەت مونيتورينگى» ءمودۋلى ۇلكەن كولەمدەگى دەرەكتەردى وڭدەۋ جانە اۋديتورلار تاراپىنان حابارلامالاردى دايىنداۋ ۋاقىتىن ايتارلىقتاي قىسقارتتى. بۇل ءوز كەزەگىندە باقىلاۋ شارالارىنىڭ جەدەلدىگى مەن ساپاسىن ارتتىرۋعا ىقپال ەتەدى.
سونىمەن قاتار ق ر قارجى مينيسترلىگى ىشكى مەملەكەتتىك اۋديت كوميتەتى مەن «ەلەكتروندىق قارجى ورتالىعى» اق بىرلەسىپ، ءموبيلدى قوسىمشالار ارقىلى زاڭسىز الىنعان بيۋدجەت قاراجاتىن قايتارۋ بويىنشا جاڭا فۋنكسيونال ازىرلەۋدە. بۇل سيفرلىق شەشىم الدىن الۋ شارالارى شەڭبەرىندە ەرىكتى تۇردە قايتارۋ ءراسىمىن ەداۋىر جەڭىلدەتەدى.
«قارجى مينيسترلىگى ءوز پروسەستەرىن سيفرلاندىرۋعا بەلسەندى تۇردە ۇمتىلىپ وتىر. زاماناۋي تەحنولوگيالاردى ەنگىزۋ بيۋدجەت قاراجاتىن باسقارۋداعى اشىقتىقتى، جەدەلدىكتى جانە تيىمدىلىكتى ارتتىرۋعا باعىتتالعان. «ونلاين بيۋدجەت مونيتورينگى» ءمودۋلى سياقتى سيفرلىق قۇرالداردى پايدالانۋ ادامي فاكتوردى ازايتىپ، كۇندەلىكتى وپەراسيالاردى اۆتوماتتاندىرۋعا جانە باقىلاۋ ساپاسىن جاقسارتۋعا مۇمكىندىك بەرەدى. بۇل مەملەكەتتىك قاراجاتتىڭ ءتيىمدى جانە جاۋاپتى جۇمسالۋىنا سەپتىگىن تيگىزەدى»، – دەپ قورىتىندىلادى ق ر قارجى ءمينيسترى ءمادي تاكييەۆ.