قاراشادا قازاقستاندا تۇماۋدىڭ ءۇش شتامى تارالۋى مۇمكىن

اۋرۋدىڭ الدىن الۋدىڭ ەڭ ءتيىمدى ءادىسى – ۆاكسينالاۋ.

دەنساۋلىق ساقتاۋ ۆيسە-مينيسترى – باس مەملەكەتتىك سانيتارلىق دارىگەر ايجان ەسماعامبەتوۆا وكق بريفينگىندە قازاقستانداعى تۇماۋدىڭ شتامدارى تۋرالى ايتتى، دەپ حابارلايدى Almaty-akshamy.kz Egemen.kz سىلتەمە جاساپ. 

ايجان ەسماعامبەتوۆانىڭ ايتۋىنشا، ەلدە جىل سايىن تۇماۋ ۆيرۋسىنىڭ اينالىمى قاراشا ايىنان باستالىپ، ءساۋىر ايىنىڭ ورتاسىنا دەيىن سوزىلادى.

«ددۇ مالىمەتتەرى بويىنشا الداعى ەپيدەميالىق ماۋسىمدا ۆيرۋستىڭ ءۇش شتامى وزەكتى بولادى، ولار A (H1N1)، A (H3N2) جانە B»،- دەدى باس مەملەكەتتىك سانيتارلىق دارىگەر.

ول وتكەن جىلى جرۆي-مەن 3،9 ملن ادام اۋىرعانىن جانە 2019-2020 جىلعى ەپيدەميولوگيالىق ماۋسىممەن سالىستىرعاندا رەسپۋبليكا بويىنشا سىرقاتتانۋ 1،3 ەسە وسكەنىن ايتتى. ءوسىم قاراعاندى وبلىسىن قوسپاعاندا، بارلىق وڭىرلەردە بايقالدى. ناۋقاستاردىڭ 80%-ى بالالار مەن جاسوسپىرىمدەرگە تيەسىلى.

«سونىمەن قاتار جىل سايىن اينالىمداعى شتامدار وزگەرىپ وتىراتىنى بايقالدى. وتكەن ماۋسىمدا تۇماۋ ۆيرۋسىنىڭ 2 شتامى – A (H3N2) جانە B اينالىمدا بولدى، بارلىعى 915 تۇماۋ جاعدايى انىقتالدى، جۇيەلەۋ ناتيجەلەرى بويىنشا شتامدار ۆاكسينالىق شتامدارعا سايكەس كەلدى»، - دەپ قوستى ۆيسە-مينيستر. 

قازاقستاندا تۇماۋدان بولەك باسقا دا ۆيرۋستار انىقتالدى. وتكەن ماۋسىمدا بارلىعى 10 مىڭنان استام ۇلگى زەرتتەلدى، ولاردىڭ ىشىندە رينوۆيرۋس، مس ۆيرۋسى، ادەنوۆيرۋستىق ينفەكسيا، پاراگريپپ، مەتاپنيەۆموۆيرۋس، بوكاۆيرۋستىق ينفەكسيا انىقتالدى.

باس سانيتارلىق دارىگەر اۋرۋدىڭ الدىن الۋدىڭ ەڭ ءتيىمدى ءادىسى ۆاكسينالاۋ ەكەنىن اتاپ ءوتتى.