قاراعاندىدا پوليسيا بالالار مەكەمەسىنىڭ تاربيەلەنۋشىلەرىنەن اقشا بوپسالاۋمەن اينالىسقان ۇيىمداسقان توپتىڭ ارەكەتىن اشكەرەلەدى، دەپ حابارلايدى Aqshamnews.kz ءتىلشىسى Polisia.kz-كە سىلتەمە جاساپ.
مالىمەتكە سايكەس، 8 قاڭتاردا ۇيىمداسقان قىلمىسقا قارسى كۇرەس باسقارماسىنىڭ جەدەل قىزمەتكەرلەرى پروكۋراتۋرامەن بىرلەسىپ، الەۋمەتتىك وسال ساناتتاعى ازاماتتارعا ارنالعان ارنايى مەملەكەتتىك تولەمدەردەن اقشا بوپسالاۋعا قاتىسى بار توپتى انىقتاعان. جەدەل ءىس-شارالار كەزىندە وڭىردەگى بالالارعا ارنالعان مەكەمەلەردىڭ ءبىرىنىڭ تاربيەلەنۋشىلەرى قىلمىسكەرلەردىڭ قۇربانى بولعانى بەلگىلى بولدى.
الدىن الا دەرەك بويىنشا، سوڭعى جارتى جىلدا كۇدىكتىلەر الداۋ، قورقىتۋ جانە كۇش قولدانۋ ارقىلى بىرنەشە جابىرلەنۋشىدەن 10 ملن تەڭگەدەن استام قاراجات يەمدەنگەن. ولار بالالاردى ارنايى شوتتاردان اقشا شەشۋگە جانە ميكروقارجى ۇيىمدارىندا نەسيە راسىمدەۋگە ماجبۇرلەگەن.
ءتىنتۋ بارىسىندا كۇدىكتىلەردەن اۆتوماتتى اتىس قارۋىنا ارنالعان وقجاتارلار جانە جۇزدەن استام ءوق-دارى تاركىلەنگەن. اتالعان فاكتى بويىنشا بوپسالاۋ بەلگىلەرىمەن سوتقا دەيىنگى تەرگەۋ باستالىپ، بارلىق كۇدىكتىلەر ۇستالدى. ولارعا 10 جىلعا دەيىن باس بوستاندىعىنان ايىرۋ جازاسى ءقاۋپى ءتونىپ تۇر.