ۇلتتىق كينونى قولداۋ ورتالىعى مەن قاراعاندى وبلىستىق زاعيپ جانە كوزى ناشار كورەتىندەرگە ارنالعان كىتاپحانا «قولجەتىمدى كينو» جوباسى اياسىندا ىنتىماقتاستىق تۋرالى مەموراندۋمعا قول قويدى، دەپ حابارلايدى aqshamnews.kz
مەموراندۋمنىڭ ماقساتى – قاراعاندى وبلىسىنداعى زاعيپ جانە كوزى ناشار كورەتىن ازاماتتاردىڭ قازىرگى زامانعى ەكراندىق مادەنيەتكە قول جەتىمدىلىگىن كەڭەيتۋ.
كەلىسىم اياسىندا قازاقستاندىق فيلمدەر تيفلوكوممەنتارييلەرمەن كورسەتىلىپ، كورۋ قابىلەتى بۇزىلعان كورەرمەندەرگە وتاندىق كينەماتوگرافتىڭ اتموسفەراسىنا ەنۋگە مۇمكىندىك جاسالادى. بۇل ىنتىماقتاستىق كوممەرسيالىق ەمەس سيپاتقا يە جانە مۇمكىندىگى شەكتەۋلى ادامداردى الەۋمەتتىك بەيىمدەۋگە باعىتتالعان.
مەموراندۋم اياسىندا تيفلوفيلمدەردىڭ كورسەتىلىمى ۇيىمداستىرىلادى. تيفلوتۇسىنىكتەمەلى فيلمدەر اۋديوسيپاتتامامەن قاتار ۇسىنىلادى. سونىڭ ىشىندە ورتالىقتىڭ قولداۋىمەن تۇسىرىلگەن «ءۇمىت ساۋلەسى»، «بوكسەر»، «بۇركىت» جانە تاعى دا باسقا كارتينالار بار. اتاپ ايتقاندا، «ءۇمىت ساۋلەسى» ءفيلمى پاريج وليمپياداسىندا توپ جارعان ەرعالي شامەيدىڭ ەرىك-جىگەرىن بايانداسا، «بوكسەر» ءفيلمى سەرىك ساپييەۆتىڭ سپورتتاعى جەتىستىكتەرىن پاش ەتەدى. ال «بۇركىت» ءفيلمى قۇقىق قورعاۋ ورگاندارىنىڭ كوزسىز ەرلىگىن دارىپتەيدى. الداعى ۋاقىتتا بۇدان باسقا دا وتاندىق فيلمدەرىمىزدى جۇيەلى ۇسىنىپ، باستامانى ەلىمىزدىڭ وزگە وڭىرلەرىندە جالعاستىرۋدى جوسپارلاپ وتىرمىز.
«مادەنيەت پەن ونەر، كينو بارلىعىنا بىردەي قولجەتىمدى بولۋى قاجەت. ءبىز بۇل جوبانىڭ ينكليۋزيۆتى قوعام قۇرۋ جولىنداعى ماڭىزدى قادام بولاتىنىنا سەنەمىز!»، – دەدى ۇلتتىق كينو ورتالىعىنىڭ باسقارما ءتوراعاسى قۇرمانبەك جۇماعالي.