قانت ءوندىرۋ جەتى ەسەگە كوبەيەدى

بۇل ءۇشىن 5-6 جىل ىشىندە وسى سالاعا جەڭىلدەتىلگەن نەسيەلەر مەن سۋبسيديالار قاجەت.

اۋىل شارۋاشىلىعى مينيسترلىگى قانت ءوندىرىسىن جەتى ەسە ارتتىرىپ، ونىڭ يمپورتىن 32%-عا ءتۇسىرۋدى جوسپارلاپ وتىر، دەپ حابارلايدى Almaty-akshamy.kz.

بۇل تۋرالى ۇكىمەت وتىرىسى بارىسىندا ۆەدومستۆو باسشىسى ەربول قاراشوكەيەۆ ايتتى.

«قانت ءوندىرىسىن 7 ەسە، 254 مىڭ تونناعا دەيىن ۇلعايتۋ، قانت يمپورتىن 32%-عا تومەندەتۋ كۇتىلۋدە. بۇل ىشكى نارىقتىڭ وتاندىق وندىرىستەگى قانتپەن قامتاماسىز ەتىلۋىن 7%-دان 43%-عا دەيىن ارتتىرۋعا مۇمكىندىك بەرەدى. بۇدان باسقا، جوعارىدا كورسەتىلگەن ناتيجەلەردى الۋ ءۇشىن 5-6 جىل ىشىندە سۋبسيديالار مەن جەڭىلدىكتى كرەديتتەر بەرۋ ارقىلى مەملەكەتتىك قولداۋ قاجەت»، - دەدى قاراشوكەيەۆ.

ول قازاقستاندا جىل سايىنعى قانت تۇتىنۋ شامامەن 532 مىڭ توننانى قۇرايتىنىن، ونىڭ ىشىندە وتاندىق شيكىزات ەسەبىنەن 7%-دى قۇرايتىنىن ەسكە سالدى. بۇل ءوندىرىستىڭ ۇساق ساتىلىمىنا، سۋارۋعا سۋدىڭ جەتىسپەۋىنە، قانت قىزىلشاسىن ءوسىرۋ كەزىندەگى قول ەڭبەگىنە، قانت زاۋىتتارىنىڭ توزۋىنا، رەسەيلىك وندىرۋشىلەردىڭ دەمپينگتىك باعاسىنا بايلانىستى.

سۋمەن قامتاماسىز ەتۋ، ەگىس القاپتارىن 14،5 مىڭ گەكتاردان 38 مىڭ گەكتارعا دەيىن كەڭەيتۋ، سالانى ينفراقۇرىلىمدىق دامىتا وتىرىپ، قانت زاۋىتىن جاڭعىرتۋ جانە جاڭا زاۋىت سالۋ – مىنە، اشم وسىنداي جوبالاردى ىسكە اسىرىپ، جالپى ءونىم جيناۋدى 332 مىڭ توننادان 1،8 ملن تونناعا دەيىن ارتتىرۋدى جوسپارلايدى.