قانداس ستۋدەنتتەردىڭ كاسىپ اشىپ، ونى دوڭگەلەتىپ اكەتۋى ءۇشىن قولداۋ كورسەتىلمەك

«قازاق بيزنەس كەمپ» جوباسىن اشۋ جوسپارلانىپ وتىر

جوبا اياسىندا شەتەلدەن كەلگەن قانداس ستۋدەنتتەرگە ءوز كاسىبىن اشۋعا جانە ونى قولداۋعا مۇمكىندىك جاسالماق. ال بۇل يگى باستامانى «Otandastar Qory» قولعا الىپ وتىر، دەپ حابارلايدى Almaty-akshamy.kz

بۇل تۋرالى ەلوردادا وتكەن قانداس ستۋدەنتتەرمەن كەزدەسۋ بارىسىندا «Otandastar Qory» پرەزيدەنتىنىڭ كەڭەسشىسى ديدار بولات مالىمدەدى. ونىڭ ايتۋىنشا، شەتەلدەن كەلەتىن جاستاردىڭ باسىم كوپشىلىگى وقۋى اياقتالعاننان كەيىن قايتادان ەلدەن كەتىپ جاتادى.

«ولار قازاقستاندا ءوز كاسىبىن اشىپ، ونى دامىتۋعا بولاتىنىن بىلە بەرمەيدى نەمەسە تاۋەكەلدەردەن قورقادى. سوندىقتان قانداستاردى قولداۋعا ارنالعان تاعى ءبىر جوبانى ازىرلەۋ ۇستىندەمىز»، – دەيدى مامان.

«بۇل باعىتتى 2019 جىلى باستاعان بولاتىنبىز. ودان كەيىن پاندەمياعا تاپ بولىپ، ءىستى توقتاتتىق. ءقازىر قايتادان قولعا الدىق. نەگىزگى ماقساتىمىز – جاستاردىڭ بيزنەس يدەياسىن قولداپ، ولارعا قازاقستانداعى بيزنەس سالاسىنداعى مىقتى ازاماتتاردى قوسۋ»، - دەيدى «Otandastar Qory» كەاق پرەزيدەنتىنىڭ كەڭەسشىسى ديدار بولات. 

ايتا كەتەيىك، بۇگىندە ەلىمىزدىڭ 20-عا جۋىق جوو-دا 7 مىڭداي قانداس ستۋدەنت ءبىلىم الادى. ولاردىڭ باسىم كوپشىلىگى موڭعوليا، جۇڭگو، وزبەكستان جانە رەسەي مەملەكەتتەرىنەن كەلگەن.