قازاقستان رەسپۋبليكاسىنىڭ يندۋستريا جانە قۇرىلىس ءمينيسترى قانات شارلاپايەۆ جۋرناليستەرگە بەرگەن سۇحباتىندا، قازاقستاندا وندىرىلەتىن تۇرمىستىق تەحنيكانىڭ شەتەلدىك ونىمدەردەن كەم ەمەس ەكەنىن اتاپ ءوتتى.
ول بارشا قازاقستاندىقتاردى ەلىمىزدە ءوندىرىلىپ جاتقان وتاندىق ونىمدەرگە نازار اۋدارۋعا شاقىردى، دەپ حابارلايدى aqshamnews.kz.
«بۇل – قازاقستاندىقتاردىڭ تاڭداۋ ماسەلەسى. ەگەر ولار وتاندىق تەحنيكانى ساتىپ العىسى كەلسە، ساتىپ الا الادى. ال ەگەر شەتەلدىك ونىمدەردى قالاسا، ولاردى دا الۋ مۇمكىندىگى بار. مەن ەكونوميكالىق پاتريوتيزم تۇسىنىگىن وتە جاقسى كورەمىن. بۇل كوپتەگەن نارسەلەردى قامتيدى، ەڭ الدىمەن، وتاندىق وندىرۋشىلەرگە باسىمدىق بەرۋدى. ەندى ەلىمىزدە ونەركاسىپتىڭ بار ەكەنىن مويىنداۋدىڭ ۋاقىتى كەلدى. بۇل سالا كولەمى جانە جىو-گە قوسقان ۇلەسى جاعىنان تاۋ-كەن ونەركاسىبىمەن تەڭ. بۇل دا ەكونوميكالىق پاتريوتيزم»، – دەدى شارلاپايەۆ.