مەملەكەت باسشىسى قازاقستان رەسپۋبليكاسىنىڭ قىلمىستىق زاڭناماسىن وڭتايلاندىرۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى زاڭعا قول قويدى.
جاڭا نورمالارعا سايكەس، ەندى قالىڭدىق ۇرلاۋ – ياعني، نەكەگە تۇرۋ ماقساتىندا ادامدى ەركىنەن تىس الىپ قاشۋ – اۋىر قىلمىس رەتىندە قاراستىرىلادى جانە 10 جىلعا دەيىن باس بوستاندىعىنان ايىرۋ جازاسى كوزدەلەدى، دەپ حابارلايدى aqshamnews.kz.
قىلمىستىڭ اۋىرلىعىنا قاراي ءۇش دەڭگەيلى جازا قاراستىرىلعان:
• 1-بولىك – زورلىق-زومبىلىقسىز الىپ قاشۋ: 2000 اەك-كە دەيىن ايىپپۇل (~7،8 ملن تەڭگە)، تۇزەۋ جۇمىستارى نەمەسە 2 جىلعا دەيىن باس بوستاندىعىنان ايىرۋ؛
• 2-بولىك – كۇش قولدانۋ نەمەسە قورقىتۋ ارقىلى الىپ قاشۋ: 5000 اەك-كە دەيىن ايىپپۇل (~19،6 ملن تەڭگە)، 3 جىلدان 7 جىلعا دەيىن باس بوستاندىعىنان ايىرۋ؛
• 3-بولىك – دەنساۋلىققا اۋىر زيان كەلتىرۋ نەمەسە ولىمگە اكەلگەن جاعدايلار: 5 جىلدان 10 جىلعا دەيىن باس بوستاندىعىنان ايىرۋ.
سونىمەن قاتار:
• نەكەگە ماجبۇرلەۋ ءۇشىن قىلمىستىق جاۋاپكەرشىلىك ەنگىزىلدى — كۇش قولدانۋ، ماتەريالدىق تاۋەلدىلىك نەمەسە قىزمەتتىك وكىلەتتىكتى پايدالانۋ ارقىلى؛
• ستالكينگ – ادامدى زاڭسىز قۋدالاۋ مەن باقىلاۋ – ءۇشىن دە جازا بەلگىلەندى؛
• ق ر قك 125-بابىنداعى ەسكەرتپە الىنىپ تاستالدى: ەندى جابىرلەنۋشىنى ءوز ەركىمەن بوساتقان ادام دا قىلمىستىق جاۋاپكەرشىلىكتەن بوساتىلمايدى.
بۇل وزگەرىستەر قازاقستاندا ءماجبۇرلى نەكەنىڭ الدىن الۋ، ايەلدەر مەن بالالاردىڭ قۇقىقتارىن قورعاۋ ماقساتىندا قابىلداندى جانە قوعامدا زورلىق-زومبىلىقتىڭ كەز كەلگەن تۇرىنە «نولدىك توزىمدىلىك» قاعيداتىن ورنىقتىرۋعا باعىتتالعان.