جۋىردا ارۋ الماتى كۇنىن مەرەكەلەيمىز. سان بوياۋلى، مىڭ جاساعان شاھاردىڭ بەت-بەينەسى كۇن ساناپ كوركەيىپ، تۇرلەنىپ كەلەدى. سوندىقتان كىم-كىمنىڭ دە الماتى تۋرالى ايتارى بولۋى زاڭدى. بۇگىن ءبىزدىڭ تورىمىزدەن شاھاردىڭ مادەني، رۋحاني كەلبەتىن جاساۋدا ايانباي ەڭبەك ەتىپ جۇرگەن تەاتر ارتيستەرى ءسوز الادى.
ايدوس بەكتەمىر، ق ر ەڭبەك سىڭىرگەن ءارتىسى، م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ءارتىسى:
– الماتىداي قالا جەر بەتىندە كوپ ەمەس. شاھاردىڭ ورنالاسقان جەرىنىڭ وزىندە قولمەن جاساعانداي تابيعي سۇلۋلىق بار. بەينەبىر الاتاۋدىڭ الاقانىندا ورنالاسقانداي كورىنىس بەرەدى.
الماتى – مادەني قالا. ءبىزدىڭ شاھارداي ۇلكەن مەگاپوليستى مادەنيەت پەن رۋحانيات ورداسىن قازاق ونەرىنىڭ شاڭىراعى اكەمتەاتر – م.اۋەزوۆ اتىنداعى اكادەميالىق دراما تەاترىنسىز ەلەستەتۋ، استە، مۇمكىن ەمەس. تەاتردىڭ مادەني وركەندەۋىنە ۇلەس قوسىپ كەلە جاتقانىنا دا عاسىرعا جۋىق ۋاقىت بولدى.
اسەم قاشاعانوۆا، ع.مۇسىرەپوۆ اتىنداعى قازاق اكادەميالىق بالالار مەن جاسوسپىرىمدەر تەاترىنىڭ اكتريساسى:
– الماتى – مەن ءۇشىن ەڭ اسەم قالالاردىڭ ءبىرى. قىركۇيەكتىڭ ءۇشىنشى اپتاسىندا جىل سايىن قالا كولەمىندە تويلاناتىن قالا كۇنىمەن تۇرعىندار مەن قوناقتاردى شىن جۇرەكتەن قۇتتىقتايمىن. قازىرگى پاندەميالىق جاعدايعا بايلانىستى قالامىزدىڭ مادەنيتىنە كوپتەگەن وزگەرىس ەنگىزىلىپ، ءبىرقاتار جاڭالىق بولىپ جاتقانىن وزدەرىڭىز جاقسى بىلەسىزدەر. ىندەتتىڭ ورشۋىنە جول بەرمەۋ ءۇشىن جاسالعان شەكتەۋلەرگە بايلانىستى قالامىزدا عانا ەمەس، الەم بويىنشا ءارتۇرلى شارالار قولعا الىندى. تەاترلار، مۋزەيلەر، تاعى دا باسقا مادەني وشاقتار ۋاقىتشا جابىلىپ، كەلۋشىلەرگە شەكتەۋلەر قويىلعانىمەن، تەاتر سۇيەر كورەرمەن مادەنيەت پەن ونەردەن قول ءۇزىپ قالعان جوق. قالا تۇرعىندارى مەن قوناقتارى ءۇشىن تەاتر پاندەميا كەزىندە دە ونلاين رەجيمدە قىزمەت ەتتى.
نۇرجامال ءابىلقياس قىزى، ع.مۇسىرەپوۆ اتىنداعى قازاق اكادەميالىق بالالار مەن جاسوسپىرىمدەر تەاترىنىڭ اكتريساسى:
– ەلىمىزدەگى مادەني، ونەر قالاسى دەپ الدىڭعى قاتارداعى شاھار – الماتىنى ايتا الامىن. قالاداعى باستى مادەنيەت وشاعى – تەاتر. تەاترلاردىڭ جىلدان-جىلعا كورەرمەنى ارتۋى قۋانتادى. ءاربىر قويىلعان قويىلىمنىڭ ءوز كورەرمەنى بارى راس. دەمەك، قالا تۇرعىندارى، اسىرەسە، جاستار اراسىندا تەاترعا دەگەن ىقىلاس ەرەكشە دەگەن ءسوز. قويىلىم ارقىلى ۇلتتىق قۇندىلىقتى دارىپتەپ، كورەرمەنگە رۋحاني اسەر قالدىرساق، بۇل – ءبىزدىڭ قالا مادەنيەتىنە قوسقان ۇلەسىمىز دەپ بىلەمىز. شاھاردىڭ رۋحاني-مادەني دامۋىندا تەاتردىڭ الار ورنى قاشان دا ەرەكشە بولىپ قالماق.
سۇحباتتاسقان گۇلجانات سەمبايەۆا.