قايىرىمدىلىق قورلارىنىڭ قۇپياسى: مينيسترلىك كوپتىڭ كوكەيىندەگى ساۋالدارعا جاۋاپ بەردى

قازاقستاندا رەسمي تىركەلگەن قايىرىمدىلىق ۇيىمدارىنىڭ سانى بۇگىندە 1372-گە جەتكەن. بۇل قاتاردا قورلار دا، قوعامدىق بىرلەستىكتەر دە، زاڭدى تۇلعالار بىرلەستىكتەرى دە بار. قاراپايىم حالىق قالتاسىنان جىرىپ بەرەتىن قايىرىمدىلىق قاراجاتتارى جينالاتىن قورلار تۋرالى نە بەلگىلى؟ جۇرت بىلمەيتىن دەرەكتەر بار ما اqshamnews.kz ءتىلشىسى رەسمي ساۋال جولداپ، وسى ماسەلە توڭىرەگىندە ادىلەت مينيسترلىگىنەن رەسمي جاۋاپ الدى. 

قورلاردى كىم باقىلايدى؟

جوعارىدا اتالعان 1400-گە جۋىق قوردىڭ ناقتى قايسىسى ءبىلىم، مادەنيەت نەمەسە ءدىني باعىتتا جۇمىس ىستەيتىنى جونىندە مەملەكەتتىك ستاتيستيكا جۇرگىزىلمەيدى ەكەن. مۇنى ادىلەت مينيسترلىگى مالىمدەدى. سەبەبى زاڭ بويىنشا قايىرىمدىلىق ۇيىمدارى ناقتى سالاعا بولىنبەيدى. ولاردىڭ بارلىعى الەۋمەتتىك جانە قوعامدىق پايدالى ماقساتتى كوزدەيتىن ۇيىم.

سونداي-اق قىزىعى، قايىرىمدىلىق قورلارىنىڭ قىزمەتىن تىكەلەي قاداعالايتىن ارنايى ورگان جوق. ادىلەت مينيسترلىگى زاڭ بويىنشا ۋاكىلەتتى ورگان سانالعانىمەن، ونىڭ فۋنكسياسى باقىلاۋ ەمەس، ىنتالاندىرۋ. ياعني مينيسترلىك قايىرىمدىلىق مادەنيەتىن دامىتۋعا، ازاماتتاردى قولداۋعا باعىتتالعان.

ال قاداعالاۋ ماسەلەسى باسقا قۇرىلىمداردىڭ قۇزىرەتىندە:

• قۇقىق قورعاۋ ورگاندارى زاڭ بۇزۋشىلىقتاردى تەكسەرەدى؛

• سالىق ورگاندارى قارجىلىق ءتارتىپتى باقىلايدى؛

• قارجى اۋدارىمدارى كەزىندە قارجىلىق مونيتورينگ زاڭدارى قولدانىلادى.

بۇل رەتتە "مەملەكەت قايىرىمدىلىق ىستەرىنە ارالاسپايدى" دەگەن قاعيدا قاتاڭ ساقتالادى.

"قايىرىمدىلىق ۇيىمى جىلىنا ءبىر رەت ەسەپ بەرۋگە مىندەتتى"

قازاقستان رەسپۋبليكاسىنىڭ 2015 جىلعى 16 قاراشاداعى № 402-V "قايىرىمدىلىق تۋرالى" زاڭىنا سايكەس، ءاربىر قايىرىمدىلىق ۇيىمى جىلىنا كەمىندە ءبىر رەت ءوز قىزمەتى تۋرالى ەسەپ جاريالاۋعا مىندەتتى. بۇل ەسەپتى ۇيىم ءوز سايتىندا نەمەسە بۇقارالىق اقپارات قۇرالدارىندا جاريالاي الادى. 

"سونىمەن بىرگە، بارلىق ۇكىمەتتىك ەمەس ۇيىمدار جىل سايىن 31 ناۋرىزعا دەيىن "ۇەۇ دەرەكقورى" جۇيەسىنە رەسمي ەسەپ تاپسىرۋعا ءتيىس. ءبىراق "قوعامدىق باقىلاۋ تۋرالى" زاڭ بويىنشا، قايىرىمدىلىق ۇيىمدارى قوعامدىق باقىلاۋعا جاتپايدى. بۇل – اشىقتىقتى قامتاماسىز ەتۋ تۇرعىسىنان كەيبىر ساراپشىلار ءجيى كوتەرەتىن ماسەلە" دەلىنگەن ۆەدومستۆو جاۋابىندا. 

قورداعى ارتىلعان قارجى قايدا جۇمسالادى؟

مينيسترلىك، اتا-انالاردىڭ ءوز بالاسىنىڭ ەمى ءۇشىن جەكە پاراقشا اشىپ، قاراجات جيناۋىن زاڭ جۇزىندە قايىرىمدىلىق ۇيىمدارىنىڭ قىزمەتىنە جاتاتىنىن جازدى. 

"ق ر "قايىرىمدىلىق تۋرالى" زاڭىنىڭ 1-بابى، 6-تارماقشاسىنا سايكەس يگەرىلمەگەن قارجى قالدىعى بولعان جاعدايدا، اتالعان قارجىنى قايىرىمدىلىق باعدارلاماسىنا سايكەس كەلەتىن باسقا ازاماتقا قولدانۋى مۇمكىندىگى بار" دەپ جاۋاپ بەردى مينيسترلىك. 

قازاقستاندىق قورلار قاراجاتىن شەتەلگە جىبەرە الا ما؟

قازاقستاندىق قورلاردىڭ قاراجاتىن شەتەلگە جىبەرۋ زاڭدى، ءبىراق ول ءۇشىن ۆاليۋتالىق زاڭناما مەن قارجىلىق مونيتورينگ تالاپتارى ساقتالۋى كەرەك. مينيسترلىك تەرروريستىك ۇيىمدارعا قاراجات اۋدارۋعا قاتاڭ تىيىم سالىنعانىن اتاپ ءوتتى. مۇنداي جاعدايلار بولسا، ولاردى انىقتاۋ مەن قۋدالاۋ تەك قۇقىق قورعاۋ ورگاندارىنىڭ قۇزىرىندا بولادى.

سونداي-اق، الداعى ۋاقىتتا ادىلەت مينيسترلىگى جانىنان ارنايى جۇمىس توبى قۇرىلىپ، قايىرىمدىلىق سالاسىنداعى زاڭنامانى جەتىلدىرۋدى قاراستىرىپ جاتىر. جاڭا وزگەرىستەردىڭ باستى ماقساتى – قورلاردىڭ اشىقتىعىن، جاريالىلىعىن جانە جاۋاپكەرشىلىگىن ارتتىرۋ.

ەسكە سالايىق، ءقازىر قوعامدا پەريزات قايرات ءىسى تالقىلانىپ جاتىر. 

پەريزات قايرات - Biz Birgemiz Qazaqstan قايىرىمدىلىق قورىنىڭ ءتورايىمى، قازاقستانداعى بەلسەندى ەرىكتىلەر قوزعالىسىنىڭ جەتەكشىسى رەتىندە تانىمال. ول سۋ تاسقىنىنان زارداپ شەككەندەرگە كومەك كورسەتۋ، گازا سەكتورىنداعى گۋمانيتارلىق ميسسيالار جانە باسقا دا قايىرىمدىلىق شارالارىمەن اينالىسىپ، قوعامدا بەدەلگە يە بولدى.

2024 جىلى 14 قاراشادا قارجىلىق مونيتورينگ اگەنتتىگى پەريزات قايرات 1،5 ميللياردتى جىمقىردى دەگەن كۇدىككە ىلىنگەنىن حابارلادى. 

سونىمەن قاتار ول 2023 جىلعى قاراشادا پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناپ، ونىڭ 200 ميلليونىن قالتاسىنا باسقان دەگەن كۇدىككە ءىلىندى. قما دەرەگىنشە، 2023 جىلعى جەلتوقساندا وسى اقشا ەسەبىنەن پەريزات قايرات Sensata Plaza ەليتالىق كەشەنىنەن 49 ميلليون تەڭگەگە ءۇش بولمەلى پاتەر جانە 30 ميلليون تەڭگەگە Mercedes-Benz EQE 500 4 Matic جاڭا كولىگىن ساتىپ العان.

2024 جىلى 16 قاراشادا استانا قالاسىنىڭ تەرگەۋ سوتى پەريزات قايرات 2 ايعا قاماۋعا الىنعانىن حابارلادى. 

2024 جىلى 13 جەلتوقساندا پەريزات قايراتتىڭ ەليتالىق پاتەرلەرى، قىمبات كولىكتەرى بۇعاتتالدى. سونداي-اق پەريزات قايراتتىڭ تۇرعىلىقتى جەرىن ءتىنتۋ بارىسىندا قايىرىمدىلىققا جينالعان قاراجاتقا ساتىپ الىنعان قىمبات تەحنيكا، Cartier، Graff، Rolex، Bulgari، Gucci، Louis Vuitton، Versace، Chopard، Hermes، Dolce & Gabbana، Prada جانە ت. ب. سياقتى تانىمال الەمدىك برەندتەردىڭ كيىمدەرى، اياقكيىمى، زەرگەرلىك بۇيىمدارى، سومكەلەرى تاركىلەندى. 

بۇدان بولەك، ۇلىنىڭ ەمىنە حالىقتان اقشا جيناپ، ونى قۇمار ويىنعا قۇرتىپ جۇرگەن توتاقانوۆتارعا قاتىستى قىلمىستىق ءىس قوزعالدى. ەرلى-زايىپتى قايىرىمدىلىق جەلەۋىمەن جۇرتتان جيناعان ميلليارد 300 ملن تەڭگەنى ءوز قاجەتىنە جۇمساعان.