پەريزات قايرات پەن ونىڭ اناسى عايني الاشبايەۆاعا قاتىستى ءىس بويىنشا وتكەن وتىرىستا پروكۋرور ارمان قازەكەن ايىپتاۋ تاراپى سوتتان قانداي جازا تاعايىنداۋدى سۇراپ وتىرعانىن ايتتى، - دەپ حابارلايدى aqshamnews.kz ءتىلشىسى.
تاراپتاردىڭ ءجارىسسوزى كەزىندە پروكۋرور پەريزات قايراتتى 10 جىلعا باس بوستاندىعىنان ايىرىپ، مۇلكىن تاركىلەۋدى سۇرادى. ال ونىڭ اناسى عايني الاشبايەۆاعا – ورتاشا قاۋىپسىزدىك مەكەمەسىندە 8 جىل باس بوستاندىعىنان ايىرۋ جازاسىن سۇرادى.
ەسكە سالا كەتەيىك، كەشە پەريزات قايرات ءىسى بويىنشا سوت وتىرىسى جابىق رەجيمدە ءوتتى. بۇل شەشىم بانك قۇپياسىن قامتيتىن قۇجاتتار سياقتى قۇپيا دەرەكتەردىڭ قارالۋىنا بايلانىستى قابىلدانعان.
سوتتىڭ باسپا ءسوز قىزمەتى تاراتقان مالىمەت بويىنشا، كۇننىڭ العاشقى جارتىسىندا زاتتاي دالەلدەمەلەر زەرتتەلىپ، تاراپتار بىرنەشە ءوتىنىش ءبىلدىردى، سونداي-اق ايىپتالۋشى پەريزات قايراتتان جاۋاپ الىندى. ال ونىڭ اناسى عايني الاشبايەۆا ءوز قۇقىعىن پايدالانىپ، جاۋاپ بەرۋدەن باس تارتتى.
پەريزات قايرات ءىسى
پەريزات قايرات – قازاقستانداعى قوعام بەلسەندىسى ءارى كاسىپكەر. ول 2021 جىلعى ماۋسىمدا قۇرىلعان قايىرىمدىلىق قوردىڭ نەگىزىن قالاۋشى جانە باسشىسى رەتىندە تانىمال.
2024 جىلعى قاراشادا پەريزات قايرات 1،5 ميلليارد تەڭگەدەن استام قاراجاتتى جىمقىردى دەگەن كۇدىكپەن ۇستالدى. بۇل قاراجات سۋ تاسقىنىنان زارداپ شەككەندەرگە كومەك كورسەتۋ ماقساتىندا جينالعان بولاتىن. تەرگەۋ مالىمەتىنشە، قاراجاتتىڭ ءبىر بولىگى جەكە ماقساتتارعا – جىلجىمايتىن مۇلىك، اۆتوكولىك جانە قىمبات شەتەلدىك ساپارلارعا جۇمسالعان.
سونداي-اق پەريزات قايراتتىڭ قور قاراجاتىن قولما-قول اقشاعا اينالدىرۋ ءۇشىن دوس-جاراندارى مەن تۋىستارىن تارتقانى جانە ولارعا بۇل قىزمەتتەرى ءۇشىن سىياقى تولەگەنى دە ايتىلعان.