جازدا قىشىما اۋرۋى ءجيى كەزدەسەدى جانە كۇن ساۋلەسى تەرىمىزگە جاعىمدى اسەر ەتۋىمەن قاتار، تەرى اۋرۋلارىنىڭ ءقاۋپىن دە ارتتىرادى. تىكەلەي كۇن ساۋلەسى مەلانوما سياقتى ءقاۋىپتى اۋرۋلاردىڭ دامۋنا اكەپ سوعادى. تەمىرجول جانە سۋ كولىگىندەگى سانيتاريالىق-ەپيدەميولوگيالىق باقىلاۋ ءبولىمىنىڭ باسشىسى جازدا تەرى اۋرۋلارىن جۇقتىرىپ الماۋعا كەڭەستەر بەردى، دەپ حابارلايدى aqshamnews.kz ءتىلشىسى.
دارىگەردىڭ ايتۋىنشا، كۇنگە كۇيۋ تەرىنىڭ قارتايۋىنا جانە زاقىمدانۋىنا سەبەپ بولادى.
ادامدار دەنەنىڭ قىشۋىنا كوبىنە اسا ءمان بەرمەيدى. ونى اللەرگيادان نەمەسە دەنەنىڭ كىرلەۋىنەن دەپ ويلاپ جۇرە بەرەدى. ءبىراق جازدا دەنە قىشىپ مازانى السا، قىشىما كەنە جۇرگەن بولۋى مۇمكىن. ونىڭ كولەمى وتە كىشكەنتاي بولعاندىقتان كوزگە دە كورىنبەيدى.
بۇل اۋرۋ جىلدىڭ بارلىق مەزگىلىندە بايقالادى. ءبىراق ادامدار ونىڭ جازدا تارالۋىنا وڭتايلى ءسات تۋدىرادى. جەڭىل، اشىق كيىنەدى، جاعاجايعا، كىسى كوپ شوعىرلانعان ورىندارعا بارادى. تۋريستەرگە گيگيەنا قاعيدالارىن ساقتاۋعا ۇنەمى قولايلى جاعداي بولا بەرمەيدى. سونىڭ اسەرىنەن ءتۇرلى جۇقپالى اۋرۋ ادامنان ادامعا وڭاي جۇعادى.
جازدا تەرىنى كۇتۋ باسقا مەزگىلگە قاراعاندا قيىنىراق. ويتكەنى ءجيى تەرلەۋ دەنەدە ءتۇرلى ميكرواعزانىڭ كوبەيۋىنە، بەزەۋدىڭ، جارانىڭ پايدا بولۋىنا سەبەپ بولادى. باكتەريا وڭاي تاراپ، تەرىنىڭ كوپتەگەن ينفەكسيا اگەنتىمەن جاناسۋىنا اسەر ەتەدى. ءدال وسى سەبەپتەرگە بايلانىستى جازدا تەمىرەتكى، تەرى، تىرناق ساڭىراۋقۇلاقتارى پايدا بولادى.
تەمىرەتكى جۇقسا، تەرىدە قىزىل داقتار، شەڭبەرلەر پايدا بولىپ، ءبورتىپ، شاش تا تۇسە باستايدى. بالاعا تەمىرەتكى جانۋارلارعا جاقىنداۋىنان دا جۇعۋى مۇمكىن. ول بالانىڭ دەنەسىنە عانا ەمەس، قالىپتاسۋىنا، دامۋىنا دا زيان كەلتىرەدى. دارىگەر سول سەبەپتى تەمىرەتكىنى ەمدەۋدى ۋاقىتىنان كەشىكتىرىپ الماۋدى ەسكەرتەدى.
تەرىنىڭ تەرشەڭدىگى دە – نيەۆرولوگيالىق اۋرۋلاردىڭ ءبىر سيمپتومى. اياقتىڭ تەرلەۋى، جاعىمسىز ءيىستىڭ شىعۋى – كوبىنە ساڭىراۋقۇلاق اۋرۋلارىنان جانە ۆەگەتاتيۆتى جۇيكەنىڭ بۇزىلىستارىنىڭ ناتيجەسىندە پايدا بولادى.
تەرىنىڭ ساڭىراۋقۇلاقتى اۋرۋلارى ءجيى كەزدەسەدى. ويتكەنى دەنە تەرلەيدى، كۇننىڭ ىستىعىنان تەرشەڭدىككە بوي الدىرامىز. ال ساڭىراۋقۇلاق ىلعالدى، سۋلى جەردى جاقسى كورەدى. سونىمەن قاتار قايىزعاقتار دا ساڭىراۋقۇلاقتار اۋرۋىنىڭ ناتيجەسى دە بولۋى مۇمكىن. وعان ساڭىراۋقۇلاققا قارسى دارىلەردى قولدانۋ كەرەك. ونى ارينە، قانداي اۋرۋ دان ەكەنىن الدىمەن انىقتاۋ قاجەت. ول ءۇشىن لابوراتوريالىق دياگنوستيكادان جاساۋ كەرەك.
تەرى اۋرۋلارىنان قالاي ساقتانۋ كەرەك؟
ادامدار بار بولعانى بىرنەشە ماڭىزدى قاعيدانى ۇستانىپ، ءقاۋىپتى اۋرۋلاردان ساقتانا الادى. ولار:
• تاڭعى 10:00 مەن تۇسكى 16:00 ارالىعى – كۇن ساۋلەسى ەڭ بەلسەندى بولاتىن ۋاقىت. بۇل ۋاقىتتا كولەڭكەدە بولۋ.كۇننىڭ استىندا ۇزاق جۇرمەۋ؛
• جەڭى ۇزىن، جەڭىل، جابىق كيىم تاڭداۋ. اسىرەسە، سىرتقا باسكيىمسىز شىقپاۋ؛
• SPF 30 نەمەسە ودان جوعارى كۇننەن قورعايتىن كرەم پايدالانۋ؛
• جەكە گيگيەنانى قاتاڭ ساقتاۋ؛
• كوزگە كۇننەن قورعايتىن كوزىلدىرىك تاعىۋ
• تەرى كۇتىمىنە ارنالعان قۇرالداردى پايدالانۋ.
دەنەڭىزدە بورتپەلەر بايقاساڭىز، بىردەن دەرماتولوگتىڭ كومەگىنە جۇگىنۋ قاجەت. ويتكەنى ءار ادامداعى تەرى اۋرۋى ءتۇرلى سيپاتتا بولادى جانە ءبىر ادامعا قولدانىلعان ەم ەكىنشىگە كومەكتەسپەۋى مۇمكىن. سول سەبەپتى تەرى اۋرۋىن ەمدەۋ تەك ءدارىحانادان ءدارى، جاقپا ماي الۋمەن شەكتەلمەيدى.